«Маңғыстау KZ» командасы ашық лигадан бас жүлде алды
«Қазақстан теміржолшысы» газетінің тілшісі
«Маңғыстау KZ» деген атпен көпшілікке таныс Маңғыстаудың жас та өнерлі теміржолшыларынан құралған әзілкештер командасын кім білмейді? Жуырда Маңғыстау облысының орталығы Ақтау қаласы күніне орай ұйымдастырылған «Жайдарман» ойындарында түбектің ҚТЖ командасы бас жүлдені жеңіп алды.
Жайдарман ойындарының ашық чемпионаты бойынша ½ жартылай финалында үздік командалық ойын көрсеткен теміржолшылар өз қарсыластарынан озық болып шықты. «Маңғыстау KZ» атымен таныс теміржолшы жайдарманшылар лигада өзге 6 командамен бәсекеге түсіп, бақ сынады. Финалға жолдама алған 5 команданың ішіндегі аталған жеңімпаз команда қала күніне орай тігілген арнайы Кубокты ұтып алып, теміржолшылардың мерейін үстем етті.
Команда капитаны, белсенді маңғыстаулық теміржолшы жас Қуатбек Көпбаевтың айтуынша, Жайдарман ойындары сәлемдесу, бессайыс және үй тапсырмасы деген үш турдан тұрған. Жеңімпаз команда еліміздегі соңғы жаңалықтар бойынша өткір әзілдерді өз ойындарының тақырыбына арқау еткен. Олардың уытты да өткір әзілмен шынайы жағдайды астарлап көрсеткен ойындары көптің көңілінен шығып, теміржолшы жастар өнеріне ұзақ қол соғып, қошемет көрсетті. Танымал жайдарманшылар мен облыстағы театр және радио қызметкерлерінен құралған қазылар алқасы бірауыздан «Маңғыстау KZ» бас жүлдеге лайық деп тапты. Жарысқа облыстағы өзге де аудандардан және колледждерден құрама командалар қатысқан.