Атырауда экологиялық сенбілік өтті
Атырау облысы бойынша меншікті тілші
Темір жол бойында тазалықтың сақталуы – теміржолшылар бақылауындағы басты шарт. Атырау жүк тасымалы бөлімшесінде жуырда осы мәселеге орай Ақжайық станциясы маңын тазалау бағытында экологиялық сенбілік өтті.
Аталған станция Атырау мұнай өңдеу зауытымен тығыз қарым-қатынаста жұмыс істеп, мұнда негізінен мұнай өнімдері тасымалданатындықтан жердің ластануы жиі орын алады. Осыған орай Атырау жүк тасымалы мен магистральдық желі бөлімшелері басшылығының ұйғарымымен өңірдегі барлық құрылымдық мекемелер жұмылдырылып, оларды аумақты тазалауға топтопқа бөлді. Барлығы 200-ден астам адам екі күн бойына станция маңы мен бұрынғы жуу-булау станциясы аумағын шөптерден, қоқыстардан аршып, шашылып қалған қажетсіз рельс-шпалдар мен теміртерсектерді жинап, ластанған жерлерді тазалады. Қоқыстар жүк көліктеріне тиеліп, қала сыртындағы арнайы орынға апарып төгілді. Тазаланған жердің жалпы аумағы 30 мың шаршы метрді құрады.