Атырауға «Жәрдем» келді
Атырау облысы бойынша меншікті тілші
«Жәрдем» медициналық пойызы Атырау облысы аумағына да жетіп, 8 қарашадан бастап өз жұмысын Сағыз станциясынан бастады. Биыл жаңа құрам алты облыстағы 78 станцияны қамтымақ.
Жергілікті тұрғындар «Жәрдем» медициналық пойызына жылдағыдай лап қойды. Бас дәрігер Айнұр Егінбайқызының айтуынша, медициналық бригадалар құрамында терапевт, педиатр, гинеколог, хирург, ЛОР, кардиолог, невропатолог, офтальмолог, уролог, кардиолог, онколог-маммолог, стоматолог сияқты мамандар жұмыс істейді. Таңғы 10-нан бастап тұрғындарды қабылдау жүргізіле бастады. Медициналық пойыз кабинеттер ретінде жабдықталған, диагностикалық тексеру және алғашқы медициналық көмек көрсету үшін қажетті заманауи медициналық жабдықтармен: ЭКГ, УДЗ аппараты, эндоскопиялық жабдық, гематологиялық және биохимиялық анализатор, Мерлин ультрадыбыстық сканері, флюорограф, гастрофиброскоп және басқалармен жарақталған 8 вагоннан тұрады. «Негізінен қан қысымының жоғарылауы, буын ауруларына жиірек ұшырайды, сондай-ақ ішек құрылысы, көз көру нашарлығы, жүрек аурулары да бар. Бір күнде үш жүзге жуық адам келіп қаралды», – дейді дәрігерлер. Станция бастығы Н.Дүйсенбаевтың айтуынша, 8 мыңдай халқы бар станция тұрғындарының ішінде тегін медициналық тексеруден өтуге ынталылары көп, соның ішінде теміржолшылар да бар. Пойыз бұдан кейін Жамансор, Ескене, Нарын, Афанасьево, Ганюшкино, Д. Нұрпейісова, Мақат, Құлсары станцияларында да болып, жұмыс істейді. Айта кетейік, «Жәрдем» пойызы 2010 жылдан бері жұмыс істеп келе жатқан «Денсаулық» медициналық жобасына қосымша іске қосылғаны белгілі. Дәрігерлер медициналық көмекке қолы жетпейтін шалғай станциялардың және жақын орналасқан ауылдардың тұрғындарына алғашқы медициналық-санитарлық және консультативтік-диагностикалық көмек көрсетеді.