Разъезд тұрғындары қалаға көшірілді

Атырау теміржолына қарасты 496-разъездің тұрғындары Атырау қаласы, Жұлдыз ықшам ауданындағы жайлы тұрғын үйлерге көшірілді. Жергілікті бюджет қаражаты есебінен барлығы 16 отбасы, олардың арасында, әрине, кешегі теміржолшылар да бар.

 Бұл олардың көптен күткен қуанышы еді. Өйткені, бұл разъезд экологиялық қауіпті аймаққа кіреді. Мұнда әрі ешқандай инфрақұрылым жоқ. Шағын ауылда газ да, жол да жоқ. Жауын-шашыннан кейін айнала қара балшыққа айналып, авариялық қызметтер мен жедел жәрдемнің жетуіне үлкен қиындықтар туғызады. Ауылдан жергілікті жастар кетіп қалған, соңғы жылдары 496-разъезде, негізінен, жасы үлкен адамдар тұрып жатқан. Үйлерін көмір жағып, пешпен жылытып, ай сайын газ баллондарын пайдаланады. Азық-түлікті қаладан сатып алады. Қаладан 10 шақырымнан астам жерден қатынау өте қиын. – Кезінде бұл ауыл теміржолшылар қалың қоныстанған кәдуілгі кішігірім бекет болған еді. Теміржол жұмысшылары осы жерге үй салып, қоныстанды. Бірақ уақыт өте келе жағдай жоқтықтан көбісі қалаға көше бастады. Мен өмір бойына осы станцияда разъезд кезекшісі болып жұмыс істедім. Жолдасым да теміржолшы болды. Ауа лас, көмір жағамыз, азық-түлікті қаладан тасимыз, бәрінен бұрын балаларға обал. Біз осы сәтті он жыл күтіп, ақыры қолымыз жетті. Енді, міне, тілегіміз қабыл болып, қаладан пәтер беріп жатыр. Қуаныштымыз, жергілікті билікке де, темір жол басшыларына да рахмет, – дейді бекет тұрғыны, зейнеткер Адилова Зейнеш апа.

Бүгінде 496-разъезд – Атырау қаласы әкімдігінің қарамағында. Тұрғындар өздерін жайлы үйлерге көшіру туралы өтініштерін он жыл бойы жергілікті билікке айтып келген болатын. Бүгінгі күні Қарабатан станциясы мен 496-разъезд жұмысшыларына Атырау жүк тасымалы бөлімшесі қаладан арнайы автобуспен қатынауға мүмкіндік жасап отыр. Екі жыл бұрын Атырау облысы әкімінің есебіне келген 496-разъездің тұрғындары өтініштерін тағы жеткізген. Нұрлан Ноғаев бұл мәселе қаралып, жергілікті атқарушы органдар проблеманы шешудің барлық мүмкіндіктерін қарастыратынын мәлімдеген. Міне, уәде – құдай сөзі, күні кеше Энергетика министрі болып тағайындалған Атыраудың сол әкімі Нұрлан Ноғаев бекет тұрғындарының өтінішін орындады. – Қазіргі таңда Атырауда жаңа тұрғын үйлер құрылысы қарқынды жүріп жатыр. Атырау облысы әкімінің тапсырмасына сәйкес, Тәуелсіздік күні қарсаңында 496-разъездің тұрғындарын Жұлдыз ықшам ауданында орналасқан жаңа үйлерге көшіру туралы шешім қабылданды, – дейді Атырау қаласы әкімінің орынбасары Ринат Джанглишов. Сөйтіп, 496-разъезде тұрып жатқан 16 отбасы жаңа пәтерлердің кілтін қолдарына алып, қуаныштары қойнына сыймай жатыр. Пәтер кілтін табыстау барысында лента қиылып, шашу шашылды. Ал 496-разъезд жұмысына келер болсақ, мұнда қазіргі уақытта екі разъезд кезекшісі және электромеханиктер жұмыс істеуде. Разъезд қалыпты жұмысын жалғастыра бермек.