Көмек қолдарын созды
Жақсылық жасау әркімнің-ақ қолынан келеді. Бірақ, өкінішке орай, кейде сараңдық танытып көбіміз біреуден бірауыз жылы сөзімізді, қажет кезінде болмашы бір көмегімізді аянып қалатын жағдайлар да кездеседі.
Осындайда мұқтаж жандарға мысқалдай болса да көмек қолын созуды дәстүрге айналдырған Маңғыстау вагон пайдалану депосы ұжымының ісін неге үлгі етпеске?!
Депо ұжымы мен техникалық қызмет көрсету пунктінің жұмысшылары жылдың басын қайырымдылық шарамен бастағанды жөн көріпті. Олар өз қалталарынан ақша шығарып, станцияда тұратын әлеуметтік дағдайы төмен отбасылар мен жалғызбасты және көпбалалы аналарға азық-түлік жеткізіп берді.
Барлығы жеті жанұяға азық-түлікпен қолдау көрсеткен вагоншылар бұл істерін жарнамалаудан аулақ және мұндай игілікті шара депо басшылығының қолдауымен жыл сайын өтетіндіктен оны өздерінің міндеті, сауапты іс санайды. Биыл олар ең алдымен бірнеше баласымен контейнерді паналап жүрген кембағал жанұяға, тапқан айлығы шайлығына да жетпей өлместің күнін көріп жатқан отбасыға қаппен ұн, түрлі жармалар, сұйық майдан бастап, сүт тағамдары мен дәнді дақылдар, көкөністерге дейін апарып берді.
Ойда жоқта бейтаныс адамдардың көмек көрсетіп жатқанына риза болған аналар ВЧД басшылығы мен ұжымына жүрекжарды алғыстарын жеткізді.