Еріктілер жылы 2020: қозғалыс басталды
Атырау облысы бойынша меншікті тілші
Президент биылғы жылды Еріктілер жылы деп жариялағалы бұрыннан да қоғамдық жұмыстың көш басында жүретін теміржолшы жастар қанатын кеңге жая бастады.
Атырау жүк тасымалы бөлімшесіне қарасты жастардан құралған еріктілер тобы өз жұмыстарын бірнеше бағытта қатар өрбітуге күш салуда. Мысалы, өткен жолы олардың бір тобы, Атырау ЖТ бөлімшесіне қарасты станциясының ұжымы қаладағы Сәбилер үйінде болып, «Саулық» бағыты арқылы медициналық волонтерлік дамытуға үлес қосып, науқас сәбилерге қамқорлық көрсеткен болатын.
Ал жуырда Атырау магистральдық желі бөлімшесіне қарасты ПЧ, ШЧ, ВЧД, ЭЧ сынды құрылымдық мекеме қызметкерлерінен құрылған топ Еріктілер қызметінің «Қамқор» бағыты бойынша облыстық қарттар үйіне барып, ауланың тазалық жұмыстарын жүргізді. Яғни, ауланы қоқыстан тазартып, сыпырып, талдар түбін қопсытып, әктеді және темір қоршауды жаңадан қайта сырлап, қарттар үйінің шарбағын жаңа кейіпке енгізді.
«Мұндай жұмыстар алдағы уақытта да жалғасады, барлық ұжымда да теміржолшылар еріктілер жылына өз үлесін қосуға дайын», – дейді Атырау ЖТ бөлімшесі кадр бөлімінің менеджері Еркебұлан Бержанов.