Азаматтық борышына адал жан
Қызылорда облысы бойынша меншікті тілші
Елімізде етек алған төтенше жағдай кезінде «жұмыла көтерген жүк жеңіл» болатынын сөзбен емес, іспен дәлелдеп жүрген азаматтар қатарында Сексеуіл жол дистанциясының инженері Бауыржан Төлегенов те бар.
«Biz birgemiz» жобасына үн қосып теміржолшы жастарға үлгі болып отырған ол өз қаражатына азық-түлік себетін әзірлеп, мұқтаж жандардың отбасына үлестірді. Бауыржан өзінің бұл әрекетін мақтаныш санамайды, азаматтық борышым деп біледі. Ел басына күн туған бүгінгі таңда кез-келген жан осылай жасап жатыр дейді.
Әрине, қазіргі төтенше жағдай кезінде мүмкіндігі бар кез-келген азаматтың бірі жария, екіншісі жасырын қайырымдылық жасап жүр. Бәрінің мақсаты қысылтаяң уақытта өзгенің көмегіне мұқтаж жандарды демеп, бірлесіп қиындықтан шығу.
Бауыржан Төлегенов Арал ауданында жалғызбасты, көп балалы отбасы немесе жалғыз-жарым, мүгедек жандарға көмек көрсететін қорға хабарласып, Сексеуіл станциясында кімдердің көмекке өте мұқтаж екенін сұрастырып алып, екі отбасына айлығынан қаражат бөліп, азық-түлік жеткізіп беріпті.
Қуаныштысы, Бауыржан секілді азазматтық борышына адал жандар біздің елде жүздепмыңдап саналады. Әлемді жайлаған індетті біз осындай, «біріміз бәріміз, бәріміз біріміз үшін» әрекет еткен қайырым мен мейірімнің арқасында жеңеріміз хақ.