Аналар алғысын алды
Атырау облысы бойынша меншікті тілші
Адамдар сырт дүниеден оқшауланып, үйде қалған сәт бәріне бірдей жайлы болмай тұрғаны рас. Әсіресе, шиеттей балашағасы бар отбасыларға қиындау тиіп жатыр. Олардың ішінде нәпақасын тауып жүрген жұмыстары тоқтап қалып, қаржылай және азық-түліктен тарығып қалғандары да бар.
Әрине, Үкімет ондай жандарға көмек жасап жатыр. Бірақ 42 500 теңге біріне тисе, біріне тимей жатыр. Осындай жағдайда еріктілер көмегі шарапатты шара болып тұр. Сын сағатта теміржолшылардан құралған еріктілер де жағдайы төмен отбасыларға көмекке келуде. Жуырда Махамбет станциясының ұжымы Атырау қаласындағы аз қамтылған көп балалы отбасыларға қолдарынан келген көмегін жасады. «Біз асыраушысынан айырылған, жанұяда кәмелетке толмаған бес баладан жоғары баласы бар аналарға қазіргі қиын сәтте жәрдемдесуді ұйғарып, оларға азық-түлік жеткізіп бердік» дейді станция бастығы Жүсіп Қалиханов.
Атырау қаласының Балықшы, Жұмыскер, Еркінқала, Контейнерный, Авангард мөлтек аудандарында тұратын бірқатар отбасына станциялықтар ұн, шекер, күнбағыс майы, жұмыртқа, вермишель, картоп, т.б. азық-түлік апарып беріп, жүдеп отырған отбасыларын бір демеп тастады. Ұжымнан жиналған қаражат бірталай отбасыға жеткен. Әрқайсына шамамен 30 мың теңгенің азық-түлігі сатып алынды. «Жұмыла көтерген жүк жеңіл» деп осындайда айтса керек. Аналар теміржолшылардың тірлігіне шын көңілден алғыс айтты.