Ардагерлер - айрықша назарда
Қызылорда облысы бойынша меншікті тілші
Сала ардагерлерін еш уақыт назардан тыс қалдырмайтын сырбойылық теміржолшылар бүгінгідей қиын-қыстау кезеңде де олардың жанынан табыла білді.
«Біз біргеміз» акциясының аясында Қызылорда ЖТ бөлімшесінің директоры Аманкелді Арысбаев бастап, «Қазкөліккәсіп» филиалы төрағасының орынбасары Бауыржан Ахметов және бөлімшенің кәсіподақ ұйымының төрағасы Мұхтар Көпірбаевтар бар ғұмырын аймақ теміржолының өркендеуіне арнаған ардагер теміржолшылардың отбасында болып, сый-сияпат жасап, ахуалдарымен танысты.
Олардың қатарында Социалистік Еңбек Ері Оразбай Әбішев, 90 жасқа толып отырған Нина Александровна, құрметті теміржолшы София Құлымбетовалар бар.
«Сан мыңдаған адамды сарсаңға салған індет Сыр өңірінде де ірге жайып, вирус жұқтырғандар саны көбейіп келеді, дегенмен соңғы күндердегі сауыққандар санының артуы көңілге медеу. Бүгінде Президенттің пәрменімен, Елбасының бастамасымен қоғамның барлық салалары жан-жағына жақсылық жасауға, қамқорлықты қажет ететін қарапайым тұрғындарға қайырымдылық көмек көрсетуге, жұртшылықты жігерлендіруге, сабырға шақыруға атсалысуда. Біз де қолымыздан келгенше елдік шараға үн қосып, бірінші кезекте ардагерлерімізге қамқорлық жасауға міндеттіміз, - деді Қызылорда ЖТ бөлімшесінің директоры, облыстық мәслихат депутаты, партияның «Теміржол» филиалының төрағасы Аманкелді Арысбаев. «
Bizbirgemiz» акциясының аясында зейнеткерлерге көрсетілетін құрмет әрі қарай да жалғаса бермек.