Қарт майдангерге қамқорлық мол

Қызылорда бөлімшесі бойынша Жеңістің 75-ші көктеміне жеткен үш майдангердің бірі Талжан Жанасов Сексеуіл станциясында тұрады.

Ол Қазалы электрмен жабдықтау дистанциясында жұмыс жасайтын баласы Мұқаштың отбасындағы немере-шөберелерінің сүйікті атасы.

Қарт майдангерді мамыр айында құттықтаушылар қарасы мол болғанымен, бүгінгі топты ардагердің өзі ерекше сезіммен күтеді.

Себебі бұл топ ардагердің өз ұжымы. Сексеуіл станциясының бастығы Сапарғали Салмаев, орынбасары Махамбет Кенжеқараев, Сексеуіл локомотив пайдалану депосы басшының орынбасары Еркебұлан Аяғанов, цехком Рысқұл Қуатов, машинист-нұсқаушы Нұрлан Жұмқановтар бұл жолы да топ болып келіп, ардагерді құттықтады.

Соғыс ардагері Сексеуіл пайдалану локомотив депосының есебінде тіркелген. Теміржолшылар қарияға «ҚТЖ» ЖТ» АҚ басшылығының атынан Қ.Сәуірбаевтың арнайы құттықтау хатын жеткізді және «Жеңістің 75 жылдығы» төсбелгісін табыс етті.

– Соғыста Чехословакия мен Праганы неміс басқыншыларынан азат еткен ардагеріміз бейбіт заманда Сексеуіл депосында машинист көмекшісі, машинист болып, теміржолдың өркендеуіне үлес қосты, қаншама жасты осы мамандыққа баулыды. Оның отбасында дүниеге келген жеті баладан тараған ұрпақтарынан бірнешеуі қазіргі таңда аймақ теміржолында жемісті еңбек етуде. Біз майдангер ардагерімізді ҚТЖ компаниясы мен Қызылорда ЖТ бөлімшесі басшылығының атынан құттықтап, батасын алдық. Қарт майдангердің кеудесіне мерекелік төсбелгісін тағып, компания басшысының арнайы құттықтау хатын тапсырдық. Арнайы азық-түлік себеті мен қаржылай көмек ұсындық. Майдангер қарияның ұсыныс-тілектерін ешқашан ескерусіз қалдырмай, мүмкін болған барлық көмегімізді жасап келеміз,-деді Сексеуіл локомотив пайдалану депосы басшының орынбасары Еркебұлан Аяғанов.