Мүсілім Матжанов. Торқалы тоқсан жаста

Қызылорда жол дистанциясының өркендеуіне саналы ғұмырын арнаған аймақтың майталман теміржолшысы Мүсілім Матжанов мамыр айында торқалы тоқсан жасқа толды. 

Мерейтой иесін дистанция басшылығы атынан бір топ жас әріптестері құттықтай келіп, қарт теміржолшының ұзақ жылғы адал еңбегіне алғыстарын жеткізді. Дистанция бастығының орынбасары Абдулла Досымов, инженер Зәріп Досығұлов, кадр бөлімінің қызметкері Айнұр Сүгірәлиева мен ұжымның кәсіподақ ұйымы төрайымы Ғалия Ноғайбаевалар торқалы тоқсанын қарсы алып отырған ақсақалға арнайы құттықтау адресатын тапсырып, иығына шапан жауып, құрмет көрсетті.

Мүсілім ақсақал дистанциядағы еңбек жолында жолшыдан бастап жол бригадирі, жол шебері секілді жауапты жұмыстар атқарыпты. Өзінің бай тәжірибесін кейінгі буын жастарға үйретіп, еңбек еткен жарты ғасырға жуық ғұмырында ондаған шәкірт тәрбиелепті.

Мүсілім Матжановтың ұрпақтары да теміржолшылар, қазіргі таңда еліміздің шойынжол саласында ата жолын жалғастырып, жемісті еңбек етуде.

- Дистанция есебінде тұрған зейнеткерлерімізді мерей жасымен құттықтап, лайықты құрмет көрсету ұжымда бұрыннан келе жатқан, қалыптасқан дәстүріміз. Осы жолмен бүгін Мүсілім ақсақалды 90 жасқа толған торқалы тойымен құттықтадық. Ақсақал риза болып, батасын беріп қуанып қалды. Ұжым атынан мерейтой иесіне арнайы адресат әзірленіп, азық-түлік себетін бердік, дистанция басшысының орынбасары Абдулла Досымов ақсақалдың иығына шапан жапса, кадр бөлімінің маманы Айнұр Сүгірәлиева мерейтой иесінің жұбайына да қамзол кигізіп, жаулық тақты, – деді кәсіподақ ұйымының төрайымы Ғалия Ноғайбаева.

Мерейтой иесінің батасын алған құттықтаушы топ тоқсан жасаған ақсақалды ортаға алып, естелік суретке түсті.