Балалар тілегін орындады
Атырау облысы бойынша меншікті тілші
1 маусым – балаларды қорғау күніне орай Н.Жантөрин атындағы облыстық филармонияда Атырау облыстық «Зағиптар арманы» қоғамдық бірлестігінің ұйымдастыруымен көңілді шара болып өтті.
Оған зағиптар қоғамына қарасты мүгедек балалар мен ата-аналары және демеушілер қатысып, шара барысында балалардың өз күшімен дайындалған концерт қойылып, әндер шырқалды.
Сонымен қатар облыстағы әртүрлі мекемелерден келген демеушілер балаларға өз қалаулары бойынша сан түрлі сыйлықтар сыйлады. Солардың ішінде Атырау жүк тасымалы бөлімшесі де бар.
«Бізге балалардан келген хаттар бойынша сұраныстары ескеріліп, бірнеше балаға өздері қалаған сыйлықтарын алдық. Біреулері құрастырмалы ойыншық қаласа, енді бірі ас үй комбайнын, тағы біреулері телефон-планшет т.б. сұраған. Балалардың тілегін орындадық» дейді Атырау жүк тасымалы бөлімшесі кадр бөлімінің басшысы Еркебұлан Бержанов.
Облыстың әр түкпірінен келген балалар мен ата-аналары демеуші аға-апалары берген сыйлықтарын алып мәз болысты. Соңынан «Ақылды тышқан» атты қойылымды тамашалады.