1151 отбасына көмек көрсетіледі
Қызылорда облысы бойынша меншікті тілші
Жаңа оқу жылы басталар алдында және отбасы күніне орай аймақтағы 1151 отбасына ұжымдық шарт негізінде 2 және 4 АЕК көлемінде көмек көрсетіледі.
Бұған дейін жинақталған құжаттар қайта қаралып, кемтігі толықтырылып, бәрі хатқа түсірілуде. Енді бірер күнде көмек алуға тиісті көп балалы, өзгенің көмегіне мұқтаж жарымжан балаларды тәрбиелеп отырған жалғызбасты ата-аналардың отбасына да көмек беріле бастамақ.
Қызылорда ЖТ бөлімшесі кадр бөлімінің маманы Шәмшагүл Алпысбаеваның айтуынша, бөлімшедегі Қазалы вагон пайдалану және Қызылорда локомотив пайдалану деполарының теміржолшыларын қоса есептегенде 1080 балаға қолдау көрсетіледі екен.
Олардың ішінде 29 бала жалғызбасты және мүгедек балаларды қарап отырған ата-ананың қамқорлығында болса, 1051 бала көп балалы отбасыларға жатады екен.
Сонымен қатар отбасы күніне байланысты 328 бала өсіріп отырған 316 теміржолшыға да көмек берілгелі отыр. Олар екі және одан да көп балалы отбасылар санатына жатады, мұның барлығы ұжымдық шарт негізінде отбасылардың әлеуетін көтеруге негізделген игілікті жұмыс болып саналады.
Ал Қызылорда магистральдық желі бөлімшесінің кадр бөлімі маманы Аида Қаналиева бөлімшенің жеке шаруашылығы бойынша көп балалы, жалғызбасты, мүгедек бала тәрбиелеп отырған 71 отбасындағы 216 бала үшін шарт негізінде көмек берілетінін білдірді.
Бұл отбасы мүшелері бөлімшенің жеке шаруашылығы бойынша 123 бала тәрбиелеп отырған 40 отбасына және бөлімшенің вокзал шаруашылығы бойынша 93 бала өсіріп отырған 31 теміржолшының жанұясына берілмек. Мұндай көмек жыл сайын ресми түрде беріліп келсе, биылғы эпидемиялық ахуалға орай отбасының есеп-шотына қаржылай аударылады екен.