Сый-құрметпен шығарып салды

Атырау магистральдық желі бөлімшесінде бір топ маман зейнеткерлікке шықты. Олардың ішінде біреуі зейнет жасына жетсе, қалғандары – мерзімінен бұрын шығып жатқандар. Иә, ондай да болады. «ҚТЖ» ҰК» АҚ-ның «Ерте зейнеткерлікке шығу ережесі» бойынша мерзімінен бұрын шығуға рұқсат беретін адамдар санаты бар. 

Бөлімшенің персоналды басқару бөлімінің басшысы А.Жалғасбаеваның айтуынша, Ереже талабы бойынша демалысқа лауазымы қысқарған және зейнеткерлікке бес жыл қалған мамандар шыға алады. Оларға еңбек өтіліне қарай, 40 жылдан аса уақыт жұмыс жасаса, жалақының төрт еселенген мөлшерінде бір реттік сыйақы беріледі және зейнетке шыққанға дейінгі ай сайынғы төлем жүргізіледі. Яғни 70 мыңнан кем емес және 200 мыңнан жоғары емес мөлшерде жәрдемақы төленеді. 

Сәйкесінше, еңбек өтілі көп болған сайын жәрдемақы көлемі де мол болатыны түсінікті. 

Ал біздің кейіпкерлеріміздің бәрі де теміржолда қырық жылдан аса уақыт аянбай еңбек еткен нағыз майталмандар. Сонау 70-ші жылдардың соңында ашылған Гурьев темір жол техникуымының алғашқы түлектері. Өңірде теміржолшы мамандығын таңдап, саланы бірінші боп тізгіндеген жергілікті білімді мамандар. Пойыздық топ диспетчері Еркін Балтаев 42 жыл еңбек өтілімен құрметті демалысқа шықса, көп жылдар диспетчер болып еңбек еткен Жаншаев Табылды, Сағынбаев Нұрлан, Қағазғалиев Самат, Тлеуғалиев Мәди сынды майталмандар мерзімінен бұрын, 61-62 жастарында шығып жатыр.

Соңғыларының ерте шығуына өңірдегі диспетчерлер жұмысы тоқтап, штат қысқаруы себеп болды. Өйткені Ақтөбеде «Пойыздар қозғалысын басқару орталығы» жобасы жүзеге асырылып, барлық диспетчерлер сонда біріктірілген болатын. Онда барып жұмыс жасауға денсаулығы не тұрмыс жағдайы мүмкіндік бермеген мамандар Компания тарапынан қарастырылған зейнеткерлікке ерте шығу Ережесінің жеңілдігін пайдалану құқығына ие болды. 

– Темір жолда қырық жылдың үстінде еңбек еттім. Соңында бөлімшенің шұғыл басқару бөлімінде пойыз диспетчері болдым. Биыл бөлім толығымен қысқарып, Ақтөбе магистральдық желі бөлімшесі құрамына енді. Денсаулығыма, отбасы жағдайыма байланысты өз тарапымнан Ақтөбеге бара алмадым. 

Сондықтан зейнетке ерте шығу Ережесіне сәйкес құжаттар жинадым. Бұл Ереже бізге үлкен көмек болды. Жұмыстан мүлдем қысқарып қалмай, зейнеткер санатына қосылдық, ай сайынғы жәрдемақы да тағайындалды, – дейді Самат Қағазғалиев. Зейнетке ерте шыққандар да ұжымдық шарт бойынша зейнеткерлерге көрсетілетін барлық жеңілдіктерге ие болады. Бірақ оларға басқа бір жерде темір жол саласында жұмыс жасауға рұқсат етілмейді. 

Атырау магистральдық желі бөлімшесі зейнеткерлерді құрметті демалысқа шығарып салып, бөлімше басшысы Елеубай Сапаров олардың әрқайсысына Құрмет грамотасына қоса естелік сыйлықтар табыс етті.