Теміржол атакәсібіне айналған әулет өкіліне құрмет көрсетілді

Өткен апта соңында Семей ЖТ бөлімшесіндегі Жарма станциясының бастығы, әйгілі Мұсабаевтар династиясының екінші буын өкілі Мұхаметқали Мұсабаевты бөлімше басшылығы мен барша әріптестері салтанатты түрде құрметті демалысқа шығарып салды. Мұхаметқали Кәукенұлы – 942 жылдық еңбек жолы бар үлкен әулеттің салалық қызметтегі белді өкілі. Теміржолға небары 17 жасында келген ол осы кезеңге дейін саладағы барлық қызметтің баспалдағынан өтіпті. Алғашқыда қарапайым жолшы болған. Түрксіб бойындағы Аягөз, Делбегетей, Жаңасемей, Шар, Семей станцияларында сан түрлі қызмет атқарды. Әр жылдарда пойыз диспетчері, вокзал бастығы, бөлімшенің кәсіподақ төрағасы, қалпына келтіру пойызының бастығы, ревизорлық аппарат инженері, ревизор, Жаңасемей, Шар станцияларының бастығы, теміржол қауіпсіздігі бөлімінің басшысы, т.т. қызметтерді абыроймен атқарды. Зейнеткерлік жасқа Жарма станциясының бастығы ретінде шығып отыр. Салтанатты жиын барысында сөз алып, Мұхаметқали Кәукенұлының еңбек жолына тоқталған бөлімше басшысы Сиязбек Әлішев Мұсабаевтар династиясы – бүкіл семейлік теміржолшылар мақтанышы екенін жеткізді. Теміржол саласындағы адал еңбегі үшін зор алғыс білдірді. Мұхаметқали Мұсабаев 2014 жылы «Самұрық-Қазына» ұлттық әл-ауқат қоры ұйымдастырған салтанатты шарада Өмірзақ Шөкеевтің қолынан «Еңбек әулеті» медалін өңіріне таққан болатын. Сөз алған теміржолшылар да Шығыс өңіріне танымал Мұсабаевтар династиясы, расында, қазіргі таңда Аягөз, Шар, Семей ғана емес, Орал, Алматы теміржолында да үшінші-төртінші буыны еңбек етіп жүргенін тілге тиек етті. Мәселен, кейіпкеріміздің ұлы Расул да әке жолын жалғап қозғалыс саласында қызмет атқаруда. – Түрксіб дәуірінен басталатын біздің әулет аталарымыз бен әкелеріміз салған сара жолмен жүріп келеміз, олардың абырой-атағына кір келтірмеуге тырыстық. Мен осыны еңбектегі басты ұстанымым етіп алдым. Бүгінгі күні Мұсабаев әулетінде 30-ға жуық адам жұмыс істеп жатыр. Еңбек өтіліміз 942 жылды құрайды. Әр буын қазіргі қазақ теміржолының дамуына өзіндік қолтаңба қалдырып, үлес қосуда. Мен осыған қуанамын, – деді қошемет-құрметке ризашылық білдірген Мұхаметқали Кәукенұлы. Салтанатты жиын барысында барша әріптестері, кәсіподақ ұйымы әйгілі әулеттің өкіліне қазақы дәстүрмен шапан жауып, құрмет көрсетті.