Теміржолшылардың көмегінен қызылордалық оқушылар да тыс қалған жоқ

Қызылорда жүк және магистральдық желі бөлімшесі де білім күніне орай сыйлық жасады. Теміржолшылардың бірінші сыныпқа баратын балалары түгел сыйлыққа мектеп оқу құралдары толтырылған сөмке алды. – Жаңа оқу жылы қарсаңында 12 балаға оқу құралдары толтырылған сөмкеден бөлек, мектеп формасы, спорттық аяқ киімдер, жалпы баланың мектепке қажетті заттарының басым бөлігін алып бердік, – дейді НЖС бөлімшесі кәсіподақ ұйымының төрайымы Ажар Ерманова. Ал Қазалы станциясында №226 мектеп басшылығының арнайы өтінішіне орай әр түрлі әлеуметтік санаттағы 10 балаға көмек беріліпті. Игілікті шараны ұйымдастырған қазалылық байланысшылар мекемесі өз балаларымен қатар ол мектептің оқушыларына да көмек қолын созған.

– «Қазкөліккәсіп» ҚБ басшылығының жаңа оқу жылының басталуына орай ұйымдастырған акцияға орай Қазалы белгі беру-байланыс дистанциясы теміржолшыларының мектеп табалдырығын алғаш рет аттайтын 38 баласымен қоса жоғарыдағы 10 балаға кәсіподақ ұйымы атынан мектептің оқу-құралдары толтырылған сөмке табысталды. Сонымен қатар ҚТЖ компаниясы атынан 2АЕК көлеміндегі қаражат әлеуметтік көмек алатын санаттағы отбасыларға берілді, – деді кәсіподақ ұйымының төрағасы Ерсайын Сұлтанов.