Арыста теміржолшы құрметіне турнир өтті
Түркістан облысы бойынша меншікті тілші
Арыс қаласында Құрметті теміржолшы Байсейіт Танкеевті еске алуға арналған футбол турнирі өтті.
Арыс қаласы әкімдігі ұйымдастырған спорттық сайысқа теміржол саласы мен қаладағы мемлекеттік мекемелерден 7 команда қатысты. Арыс станциясы мен Вагон пайдалану депосы, Белгі беру және байланыс дистанциясы мен Желілік ісшкі істер бөлімі қызметкерлерінен құралған командаларға қала әкімдігі мен білім және спорт бөлімінің командалары қосылып, қалалық стадионда ойын көрігін қыздырды. Үздік шыққан команда қала әкімінің атынан тағайындалған арнайы кубокты иемденсе, жекелеген ойыншылар Алғыс хатпен және Танкеевтер әулетінің арнайы жүлде қорымен марапатталды.
Шараның ашылу салтанатында сөз сөйлеген қала әкімі Гүлжан Құрманбекова мұндай шараның ел ішінде бұқаралық спортты дамытуда зор серпін беретінін атап өтті. Айта кетейік, Құрметті теміржолшы Байсейіт Танкеев – Арыс қаласының тумасы, Қазақ ССР Жоғарғы Кеңесінің екі мәрте депутаты болған азамат.