Теміржолшылар арасында спартакиада өтті
«Қазақстан теміржолшысы» газетінің тілшісі
«ҚТЖ» ҰК» АҚ теміржолшылары арасында спорттың 5 түрінен спартакиада өтті. Олар волейбол, баскетбол, шахмат, үстел теннисі, шағын футболдан өзара сайысқа түсті.
Жарысқа компанияның Орталық аппараты, еншілес ұйымдарының қызметкерлері қатысты. Спортқа қашан да жақын жүретін теміржолшылар қауымы бұл жолы да белсенділік танытты. Барлығы 19 команда жиналып, спартакиада дүбірлі спорт мерекесіне ұласты. Бірнеше күнге созылған жарыс елордадағы әртүрлі спорт кешендерінде өтті. Командалар жеребе бойынша шағын топтарға бөлініп, өзара бәсеке көрігін қыздырды. Жарыс қорытындысында жалпы командалық есепте бірінші орынды иемденген «Жолаушылар тасымалы» АҚ «Солтүстік» өңірлік филиалының командасы жеңімпаз атанды. Екінші орын ВЖДО командасы – теміржол күзетшілеріне берілсе, үшінші орынға Магистральдық желі дирекциясының ойыншылары лайық деп танылды.
Сонымен қатар волейболдан да 1 орынды тағы да сол «Солтүстік» өңірлік филиалының жолсеріктері иеленсе, шахмат пен үстел теннисінен және баскетболдан Магистральдық желі дирекциясының бағы жанды. Ал шағын футболдан Астана станциясы озып шықты. Барлық жүлделі командалар дипломдармен, бағалы сыйлықтармен марапатталды. Командаларға спортқа деген жоғары белсенділігі мен шеберлігі үшін компанияның Әлеуметтік саясат департаментінің бас менеджері Ақмарал Байғабылова алғыс білдіріп, қызметте де, спортта да табыс пен сәттілік тіледі.