Әлемді мойындатқан Әлихан
Маңғыстау облысы бойынша меншікті тілші
Маңғыстау жүк тасымалы бөлімшесінің Болашақ станциясына қарасты Құрмаш бекетінің кезекшісі Әлихан Аббас Африка құрлығында еліміздің Әнұранын шырқатып, Туын көкке көтерді.
Өткен жылдың жазында АРАШИ ММА бойынша Азия чемпионы болған теміржолшы жігіт желтоқсанның соңғы күндері Египеттің Каир қаласында өткен әлемдік додаға қатысып, жиырмаға жуық елден келген спортшылар арасынан «ARASHI MMA world championship 2024» жеңімпазы атанды. Әлиханның тобы командалық есепте 1-орынға шығып, Қазақстан қоржынына 17 алтын салды.
– Чемпионатқа алты жүзден астам адам қатысты. Қазақстаннан Маңғыстаудан – 3, Орал қаласынан – 5, Шымкенттен 9 адам барғанбыз. Намысты қолдан бермей тобымызбен бірінші орынды алдық. Өзім үш рет рингке шықтым, үшеуінде де қарсыласым осал емес, Тайланд, Морокко, Египеттік «тісқаққан» жігіттер екен. Десе де, оларды уақытынан бұрын жеңдім. Өзіме артылған сенімді ақтап, еліміздің және компаниямыздың туын Мысыр елінде желбіреткеніме қуаныштымын. Маған сеніп, қолдау көрсеткен ҚТЖ басшылығына және жергілікті кәсіподақ ұйымына, әріптестеріме алғысым шексіз, – дейді әлемді мойындатқан Әлихан.
Спортшы жігіттің жаңа жылға да жоспары көп екен. Ақпан айында өзінің шәкірттерін Ресейдің Саратов қаласына жарысқа апарады, ал сәуірде Аргентинада өтетін жарысқа қатыспақ. Жаз айларында Әбу-Даби мен Ресейдегі жарыстарға жол тартпақ.
Жеңіспен оралған Әлиханды түбек теміржолшылары, жергілікті кәсіподақ өкілдері зор қуанышпен қарсы алып, елдің атын шығарған алтын ұлмен мақтанатындарын жеткізді.