Маңғыстауда теміржолшылар арасында ұлттық спорт түрлерінен жарыс өтті
Маңғыстау облысы бойынша меншікті тілші
Маңғыстаудағы теміржолшылар арасында ұлттық спорт түрлерінен асық ату, бес асық және тоғызқұмалақтан жарыс ұйымдастырылды.
Ұлттық ойындарға ерлермен қатар әйелдер де белсенділікпен қатысты. Жарыс нәтижесі бойынша асық атуда алдына жан салмаған Маңғыстау станциясынан Ерсайын Өмірғалиев 1-орынды, вагон пайдалану депосынан Тұрар Ниязов 2-орынды, Бейбіт Өмірғалиев 3-орынды жеңіп алды.
Бес асықты қолы қолына тимей, шеберлерше шыр айналдырған Маңғыстау жүк тасымалы бөлімшесінен Жарасхан Түлкібаева 1-орынды алды. 2-орын станция қызметкері Тоғжан Ізмағанбетке, 3-орын Маңғыстау электрмен жабдықтау дистанциясының намысын қорғаған Жанар Ибрашеваға бұйырды. Ерлер арасындағы тоғызқұмалақтан 1-орынның жүлдесін деполық Жайлау Жалғасбаев иемденді. 2-орын ВЧД-33 мекемесінен Нұржігіт Мәліковтің еншісіне тиді.
Тоғызқұмалаққа әуестенген қыз-келіншектердің де ойыны қызықты өтті. 1-орынды Маңғыстау станциясындағы белді спортсүйер нәзікжандардан саналатын, қай бәсекеге барса да қоржыны бос қайтпайтын Айгүл Аяпова жеңсе, екінші орынды Қамарай Калиманова алды.
Жеңімпаздар және жақсы ойын көрсеткендер арнайы марапатталды. Саламат Икеновқа «Үздік ойыншы», Құттықожа Усеновқа «Үздік байланыстырушы», Самат Тілекбайға «Үздік шабуылшы», Жанарбек Аймановқа «Үздік қорғаушы» номинациялары табысталды.