Астанада өткен сайыста теміржолшылар жеңімпаз атанды
Абай облысы бойынша меншікті тілші
Жуырда Астана қаласында халықаралық Astana Triathlon Half сайысы ұйымдастырылған болатын. Әлемнің әр түкпірінен кіл мықтылар жиналған байқауға ұлттық компанияның атынан үш эстафеталық команда қатысып, шеберліктерін сынға салды.
Жарыс талабы оңай емес, спортшылар әуелгі кезекте 1,9 км суда жүзіп, велосипедпен 90 км жүріп өтіп, ең соңғы шешуші сәтте 21,1 км аумақты жүгіріп өтуі тиіс болатын.
Команда құрамында екі бірдей семейлік теміржолшы өнер көрсетті. Осыған дейін сан мәрте топ жарып, жеңімпаз атанып жүрген Семей магистральдық желі бөлімшесінің техникалық бөлімінің бастығы Нұрлан Мысырұлы мен бөлімшенің вагондар қозғалысы жылдамдығын өлшеуші Еркебұлан Ахмадиев ұлттық компания туын биік ұстады. Біздің жігіттер ерлер арасындағы сайыста жүлделі бірінші орынды жеңіп алды.
Айта кетерлігі, Нұрлан велоспорт түрінен сайысқа түссе, Еркебұлан жүгіру бойынша жарыс жолына шығыпты. Еркебұланның жуырда ғана Жетісу облысында болып өткен «Шаған тау марафоны-2025» байқауында да теміржолшылар атынан сынға түсіп, 13 шақырымдық жарыс жолын санаулы минуттарда бағындырып, жүлделі бірінші орын иеленгенін айта кеткен жөн.
Жас спортшы даярланып та үлгермепті. Әйтсе де, қос спортшы да алдағы тамыз айында Семей қаласында Абайдың 180 жылдығына орай өткізілетін спорттық іс- шараға қатысу үшін жаттығуды бастап кетті.
