Сарышаған дистанциясында аппараттық залдар жаңғыртылуда

Сарышаған сигнализация және байланыс дистанциясының 3 бірдей желілік аппараттық залы модернизациялау бағдарламасына енгізілген. «Шу – Астана» бағыты бойынша жаңғырту кезеңіне кірген аппараттық залдардың жаңғыртылуы – жұмыс сапасын арттырып, қауіпсіздікті қамтамасыз етері сөзсіз.

Дистанция бастығы Бауыржан Қалақбасовтың айтуынша, былтыр жыл соңында басталған жаңғырту жұмыстары биыл алғашқы тоқсанда аяқталмақшы. Еліміз бойынша екі жыл бұрын басталған магистральдық желілерді модернизациялау жұмыстары қарқынды жүргізіліп жатқаны белгілі. 11 станцияда радиобайланыс орнатылған, 257 бағыттама бұрмасы бар, 267 шақырым магистральдық желі бойындағы жол қозғалысының қауіпсіздігіне жауапты Сарышаған сигнализация және байланыс дистанциясында желілік аппараттық ғимараттарды жаңғырту жұмыстары көп жылдан бері кезегін күткен мәселе-тін. Дистанцияның бас инженері Мақсат Исаев 267 шақырым желі «Неман» диспетчерлік орталықтандыру жүйесі арқылы бақыланатынын айтады. Ал бағыттағыш бұрмалардың 204 данасы жаңа италиялық «Ariston» бұрмасына ауыстырылыпты. Тағы елуінде СП-6М ресейлік бұрма қойылған.  

– Дистанцияда 583 бағдаршам, 3 теміржол өткелі бар. 2013 жылы теміржол жылжымалы құрамының қозғалыс бөліктерін диагностикалауға арналған көпфункционалды техникалық құралдар кешенін «КТСМ-01»-ден «КТСМ-02»-ге жаңартылған. Осындай модельдің 13-і бар, бұл құрылғы вагонға ілесіп, салбырап келе жатқан зат болса, бәрін тексеріп, анықтауға мүмкіндік береді. Сондай-ақ дөңгелектің қызуын бақылап, уақытылы майланды ма, жоқ па, анықтай алады. Жалпы ақауларды анықтап, оны дер кезінде жоюға керекті техникаларымыз, бір дәнекерлеу цехымыз бар. Дрезина, 9 машина, бір ЗИЛ жүк көлігі, бір тракторымыз кез келген жұмысқа дайын, жұмысшылар игілігінде, – дейді Мақсат Сейдалыұлы.  

Сигнализация және байланыс дистанцияларының жұмысын теміржол саласындағы микрохирургияға балаған бас инженер жол қауіпсіздігін қамтамасыз етуде техникалар мен құрылғылардың жаңартылуы аса маңызды екенін алға тартты.