Индонезияда екі пойыз соқтығысып, 14 адам қаза тапты
Индонезия астанасы Джакартаның маңындағы пойыз соқтығысуы салдарынан қаза тапқандар саны 14 адамға жетті, тағы 84 адам жарақат алды. Сейсенбі күні теміржол компаниясы хабарлағандай, құтқарушылар үйінділер арасында қалып қойған адамдарды шығару жұмыстарын аяқтады, деп хабарлайды Rail-news.kz.
Қала маңына қатынайтын пойыз бен алысқа баратын пойыздың соқтығысуы дүйсенбі күні кешке Джакартаға жақын маңдағы Бекаси қаласында болған.
Индонезияның «PT KAI» мемлекеттік теміржол компаниясының бас директоры Бобби Расидин мерт болғандар санының 14-ке дейін өскенін растады.
Индонезияның іздестіру-құтқару агенттігінің басшысы Мохаммад Шафии сейсенбі күні эвакуациялау жұмыстарының аяқталғанын хабарлап, майысқан вагондардан жолаушыларды құтқару өте күрделі процесс болғанын атап өтті.
«Денелерді шығару операциясын жүйелі жүргізу үшін бізге арнайы дағдылары бар мамандар қажет болды», — деді ол. Сондай-ақ, Шафии вагондарда жолаушылар қалмағанын, бірақ құтқарушылар үйінділерді тазалау барысында қандай да бір белгілер табылса, тиісті шараларды қабылдайтынын жеткізді.
Негізгі соққы тек әйелдерге арналған вагонға тиген. Шафиидің айтуынша, құрбандардың барлығы әйелдер және олардың көпшілігі темір үйінділердің астында қысылып қалған.