Тәжікстан, Иран және Ауғанстан жүк транзиті үшін жаңа көлік дәлізін құрып жатыр
Иранның Мешхед қаласында Тәжікстан, Иран және Ауғанстан арасында үшжақты автомобиль дәлізін құру туралы хаттамаға қол қойылды. Бұл құжат коммерциялық жүктерді Ираннан Тәжікстанға Ауғанстан аумағы арқылы транзитпен тасымалдауды қамтамасыз етуге бағытталған, деп хабарлайды Rail-news.kz.
Ауғанстан Көлік министрлігінің мәліметінше, жақын арадағы 30 күн ішінде үш елдің де автопарктерін қатыстыра отырып, пилоттық тасымалдауды бастау жоспарланған. Жобаны үйлестірумен тұрақты жұмыс тобы айналысады. Оның міндетіне міндеттемелердің орындалуын бақылау, әкімшілік кедергілерді жедел жою және есептілік жүргізу кіреді.
Кездесу аясында делегациялар шекаралық инфрақұрылымды жаңғырту, жүк көлігі жүргізушілері үшін визалық талаптарды жеңілдету, шекаралық бақылауды жылдамдату, жылжымалы құрамды жаңарту және біріктірілген сақтандыру жүйесін енгізу мәселелерін талқылады. Бұдан бөлек, ұзақ мерзімді келешекте бағдарды Орталық Азия елдеріне дейін кеңейтіп, Қытай нарығына шығу мүмкіндігі де қарастырылуда.
«Басты түйткілдердің бірі — инфрақұрылымдағы шектеулер, яғни негізгі өткізу пунктерінің шамадан тыс жүктелуі. Бүгінгі таңда жолдардың шамамен 65-70%-ында қатты төсем болмағандықтан, арнайы техниканы талап етеді. Сондай-ақ ауыр жүк көліктері үшін де мүмкіндіктер шектеулі. Осыдан келіп, дәстүрлі бағдарлардың дамыған инфрақұрылымымен салыстырғанда, бұл аймақтағы жағдай төмен деп бағаланады», - деп атап өтті «Авратэк» ЖШС стратегиялық даму жөніндегі директоры Мария Селина.