Мұхамеджан Тынышбаев туралы фильм түсірілді
Алаш қайраткері, қазақтан шыққан тұңғыш жоғары білімді теміржолшы-инженер Мұхамеджан Тынышпаев туралы деректі фильм жарыққа шықты, деп хабарлайды Rail-news.kz.
Алматыдағы Жол қатынастары университетінде фильмнің тұсаукесер рәсімі өтті. Алматы әкімдігінің демеушілігімен түсірілген фильмнің режиссері Жаңабек Жетіру, кеңесшісі Тынышпаев қорының президенті, алаш қайраткерінің жиен немересі Нұршакен Жүнісқызы.
Бір сағаттық деректі фильм М.Тынышпаев туған Талдықорған өңірінде түсірілген. Фильмде бала Мұхамеджанның есейіп ер жеткен, одан патшалық Петербургтің теміржол иститутын бітіріп елге келген, Жетісу және Түрксіб теміржолдарының құрылысын жобалаған, қатысқан кезінен халық жауы ретінде қуғынға ұшырап, айдауда жүрген жылдары тарихи дерек, дәйектермен суреттеледі. Тынышпаевтың ұлы Даулет Шейх-Али мен немересі Асқардың естеліктері фильм мазмұнын аша түседі.
КУПС қабырғасында өткен фильмнің тұсаукесеріне білім ордасының ректоры, кезінде Тынышпаевпен бірге қызмет атқарған, Түрксібтің бас инженері Жұмағали Омаровтың ұлы Амангелді Омаров бастаған ұстаздар мен студенттер, алаш қайраткерінің өмірі мен қайраткерлігі тақырыбында кандидаттық және докторлық диссертация қорғаған ғалым Гүлбану Жүгенбаева, Тынышпаев қорының президенті және фильмнің режиссері мен актерлар қатысты.
Деректі фильмді тамашалаған көпшілік бұл алаш тарихын тануға қосылған қомақты үлес деп жоғары бағалады.