Жылғада логистика дамиды

Жаңалықтар

07.02.2017, 12:54

Шымкент жүк тасымалы бөлімшесінің Жылға станциясы көрші Өзбекстанмен шекаралас аумақта. Бүгінде тек пойыздарды қабылдап-жөнелтетін төртінші класты бекет. Әзірге бір ғана «Алекс» кәсіпорыны болмаса, өзге жүк тасымалы жоқ. Бірақ болашағы жарқын деседі. Өйткені мұнда атшаптырым аумақты алып жатқан қоймалар салынуда. Демек, болашақта логистика дамитын нүктенің бірі Жылға болмақ. Айдар Тәшімбетовтың айтуынша, келешекте Өзбекстаннан осы жерге азық-түлік тауары әкелініп, салынып жатқан логистикалық орталықтың қоймасында сақталады. Сосын сұранысқа орай, Ресейге жөнелтілмек. Әзірге аумағы он гектарға жететін орталықтың бір ғана қоймасы салыныпты. Алдағы уақытта тоңазытқышы, басқасы бар, тағы бірнеше қойма салынатын көрінеді. Ал орталықты салушы жеке кәсіпкер қоймаға баратын кірме жолдың да құрылысын аяқтап қойыпты. – Бес жолымыз бар. Жыл соңында тастанды пойыздар көбейетіні болмаса, пойыз ағыны көп емес. Бірақ, соңғы уақытта тастанды пойыздардың өзі бір тәуліктен артық тұрмайды. Жүкті ертерек иесіне тапсыру үшін олар да ширақ қимылға көшкен. Ал, жолаушылар пойызынан Шымкент – Сарыағаш бағытындағы қала маңына қатынайтын пойыз ғана тоқтайды. Шипалы су шығаратын «Алекс» зауыты айына төрт вагон жүк артады,– дейді станция бастығы. Төрт станция кезекшісі, бір пойыз құрастырушыны қосқанда барлығы жеті теміржолшы Жылғаның жұмысын жолға қойып отыр. Ал, қозғалысшылардан басқа жолшылар мен байланысшылар, тартымдық қосалқы станциясының энергетиктерін қосқанда 18 маман осында шоғырланған.

Жылғада логистика дамиды

Басқа да жаңалықтар

Қазақстан теміржолшысы газеті, №48 23 маусым 2026 жыл