ҚҰРЫҚТАҒЫ ҚҰРЫЛЫС ҚАРҚЫНЫ АРТПАҚ

Жаңалықтар

14.02.2017, 11:18

Оқуға 2 мин

Қарт түбектің Қарақия ауданындағы Құрық портының бірінші бөлігі өткен жылы Тәуелсіздік мерекесі қарсаңында Елбасының қатысуымен онлайн режимде іске қосылғаны белгілі. Десек те, мұндағы құрылыс түгелдей аяқталды деуге әлі ерте. Ақпанның 10 күні «ҚТЖ» ҰК» АҚ «ЖТ Маңғыстау» бөлімшесінің директоры Нәжімеден Ғұбашев бастаған барлық темір жол мекемелерінің басшылары мен бас инженерлері Ақтау қаласынан 70 км қашықтықта орналасқан Құрық портына бет алды. Мұнда олар «Құрық порты» ЖШС бас директоры Мырзабек Сақтағанов пен құрылысты жүргізіп жатқан «Концерн Найза Құрылыс» ЖШС бақылау кеңесінің төрағасы Гаджи Гаджиевпен бірге «ҚТЖ» ҰК» АҚ бас инженері Бауыржан Орынбасаровты күтіп алды. Компания бас инженерімен бірге Құрыққа «Beta services» ЖШС директоры Бекболат Шканов, жоба жетекшісі Али Карабалин, Ұлттық компанияның Автоматика, телемеханика және телекоммуникация департаментінің директоры Алексей Абдраманов, басқа да жауапты қызмет өкілдері келіп, жағажайдағы құрылыс объектілерімен танысты. Бұдан кейін порт басындағы кеңседе жоба жұмысының орындалу барысы жөнінде кеңес өтті. Кеңесте Құрықтағы жұмысты жүргізіп жатқан «Концерн Найза Құрылыс» ЖШС-нің, жобалаушылардың аяқталмаған жұмыстары, байланыс жүйесінің нашарлығы, шекара қызметіндегі кейбір мәселелер сөз болды. Осыған орай, «ҚТЖ» ҰК» АҚ бас инженері Бауыржан Орынбасаров нақты тапсырмалар берді. Бітпеген жұмыстар 17 ақпанға дейін орындалуы тиістігін кесіп айтқан бас инженер мұның есебін де өзі сұрайтындығын жеткізді. Жүк тасымалы бөлімшесіне, белгі беру және байланыс, жол дистанциясы мен локомотив шаруашылығы, электрмен жабдықтау қызметіне т.т. қатысты сұрақтарға жауап берген Бауыржан Пазылбекұлы өзекті мәселелерді жоғары жақта көтеріп, шешіп беретініне сендірді. Елбасы Н.Назарбаев жуырда жариялаған дәстүрлі жолдауында еліміздің көлік және транзит әлеуетін толық ашу үшін көрші елдермен үйлесімді іс-қимыл қажеттігін, жүктердің еркін транзитін, көлік дәліздерін құру мен оларды жаңғырту ісін қамтамасыз ету керектігін айтып, «Транскаспий дәлізі бойынша тасымалдау көлемінің ұлғаюына байланысты Құрық портын салудың екінші кезеңі – автомобиль өткелі құрылысын іске асыруға кірісу қажет», – деген еді. Сондықтан, ҚТЖ басшылығы үшін одан бұрын теңіз портын пайдалануға тапсыру, сол үшін толғақты мәселелерді тездетіп шешу маңызды болып отыр. Бұл кездесу осының айғағы.

ҚҰРЫҚТАҒЫ ҚҰРЫЛЫС ҚАРҚЫНЫ АРТПАҚ

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл