Жол үстінде тоқтаған жүрек

Жаңалықтар

17.02.2017, 12:59

Оқуға 3 мин

Қазақстан темір жолында екі мәрте «Құрметті теміржолшы» төсбелгісімен марапатталған теміржолшы көп емес. Мұхамедияр Пірімбетов сол дара тұлғаның бірі еді... Қызылорданың Сұлутөр станциясында тұратын ұстаздар Әбітай мен Шәмшияның шаңырағындағы үш ұл мен екі қыздың тұңғышы Мұхамедияр бала кезден зеректігімен һәм алғырлығымен көзге түсіп, ауылдастары «әрине, мұғалімнің баласы емес пе...» десетін, баланың бойындағы ілім-білімге деген қабілетінің тек жалғыз ғана себебі осы болғандай. Алпысыншы жылдардың соңында орта мектепті үздік бітірген Пірімбетовтердің тұңғышы ел-жұртты тағы да таңқалдырып, елдің оқуын місе тұтпай сонау Мәскеуге барып, темір жол институтының жол шаруашылығы факультетіне оқуға түсті. «Ә бәсе, әне, болар бала... деген осы» десіп тағы тамсанды ауылдастар. Жоғарғы оқу орнын да үздік бітіріп, Алматыдағы «Казжелдорпроект» институтына жолдамамен келген жас инженер кеңсе жұмысын қанағат тұтпай, өндіріске сұранды. Бір жылдан соң Қызылорда темір жолы бөлімшесінің жол қызметіне аға инженер болып барады. Аз жылда қызмет сатысымен тез өскен маман ПМС-156 мекемесінің бас инженері, бөлімше бастығының жол шаруашылығы бойынша орынбасары,№57 жол дистанциясының бастығы қызметтерін абыроймен атқарды. Еңбекқорлығына тамаша ұйымдастырушылық қабілеті сай, лидерлік қабілеті көзге ұрып тұрған маманға басшылық Батыс Қазақстан темір жолы басқармасы жол қызметінің бас инженері лауызымын ұсынды. Ол кезде отыздан асып, қырыққа толмаған жігіт үшін бұл өте жауапты үлкен қызмет еді. Өндірісте жан-жақты ысылып, тәжірибесі де толысқан Пірімбетов жаңа қызметті бірден дөңгелетіп әкетті, 80- жылдары артта қалған батыстағы темір жол инфрақұрылымын көтеруге тырысып, оның өсу-өркендеу, даму дәуіріне өз қолтаңбасын қалдырды. Одан әрі 90 жылдардағы тар жол-тайғақ кешу жылдары жоқтан бар жасап, темір жолдың жұмысын тоқтатпауға тырысқан өз ісіне шын берілген жүздеген мыңдаған теміржолшылар қатарында Мұхамедир Пірімбетов те жүрді. 1997 жылы «Қазақстан темір жолы» республикалық мемлекеттік кәсіпорыны құрылған тарихи оқиға куә болып, егемен елдің темір жолын құрысуға бел шеше кірісіп кетті. Ендігі жерде өз қызметін елордасы Астанада жалғастырып, Ақмола жол бөлімшесін басқарып, аймақтық жол басқармасы өкілдігінің бас инженері болды. Хромтау – Алтынсарин темір жолының құрылысына өз қолтаңбасын қалдырып, жолды пайдалану бойынша дирекция құрылғанда, оның бас инженерлігіне бұл қызметте орасан зор тәжірибесі бар Пірімбетов бірауыздан сайланды және 2004 жылы құрылысқа ерен еңбегі сіңген бір топ теміржолшылар қатарында саланың ең жоғары мәртебесі «Құрметті теміржолшы» белгісімен екінші мәрте марапатталды. Ұлы құрылыс аяқталып, әне-міне пайдалануға берілетін қарбалас сәт қызу жүріп жатқан бір күні теміржолшының тынымсыз жүрегі... кенеттен сыр берді. Бүкіл саналы ғұмырын жол үстінде өткізген алып жүрек осылай тоқтады... Тірі болғанда ақпанның 18 күні 70 жасқа толатын теміржолшы Мұхамедияр Пірімбетов ел ағасы атанар алпысқа да жетпей, небәрі 57 жасында өмірден өткен еді.

Жол үстінде тоқтаған жүрек

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл