Транзит тасымалына – тиімді тариф

Жаңалықтар

24.02.2017, 10:43

Қазақстан мен Өзбекстан теміржолшылары екі ел арасында тасымалды арттырып, соған орай транзитке қолайлы тарифтік жеңілдік жасау жайын кеңесті. Бұл туралы сәрсенбі күні Ташкентте өткен Қазақстан мен Өзбекстан екіжақты үкіметаралық 16-отырысы аясындағы кездесуде сөз болды. «ҚТЖ» ҰК» АҚ баспасөз қызметі «Қазақстан темір жолы» ҰК» АҚ жетекшісі Қанат Алпысбаев «Узбекистон темир йуллари» АҚ басшылығымен темір жол көлігі саласындағы өзара іскерлік байланысты дамыту туралы келіссөз өткізгенін хабарлайды. Өткен жылы Қазақстан мен Өзбекстан арасындағы темір жол көлігімен жүк тасымалдауда өсім байқалған. Тасымалдау көлемі алғаш рет 19 миллион тоннаны құраған. Кездесуде екі ел аумағымен транзиттік тасымалдау көлемін одан әрі өсіру мен жеңілдік тарифін қолдану жайы талқыланды. Келіссөздер нәтижесінде Қазақстаннан экспортқа шығарылатын астық және ұн өнімдерін 45-футтық рефрижаторлық контейнерлермен тасымалдаумен қатар Қазақстан аумағы арқылы өзбекстандық жеміс-жидектерді және басқа да азық-түлік өнімдерін транзиттік тасымалдау бойынша келісімдер жасалды. Соның барысында өзбек тарапынан келетін экспорттық және импорттық шараларын Ақтау және Құрық порты арқылы Транскаспий халықаралық көлік бағдары (ТХКБ) бойынша ұйымдастыру жайына «ҚТЖ» ҰК» АҚ баса назар аударып отыр. Ташкентте «ҚТЖ- Жүк тасымалы» АҚ мен «Узбекистон темир йуллари» АҚ арасында Қазақстан аумағы арқылы жүктерді тасымалдаудың электрондық коммерциялық ілеспе құжаттары бойынша ақпарат алмасуы туралы Келісімге қол қойылды. Айта кетейік, қазақ-өзбек теміржолшылары соңғы жылдары көлік және логистика саласында өзара ынтымақтастықтығын нығайтуға қадам жасауда. Астық, ұн, ауыл шаруашылығы өнімдерінің өзге де түрлеріне, минералды тыңайтқыштар мен түрлі-түсті металдар және басқа да жүктер тасымалына транзиттік тарифті жеңілдету мәселелерін жиі көтеріп жүр. Ақпарат ретінде айта кетсек, «Узбекистон темир йуллари» АҚ 1994 жылы құрылған. Қоғамға қарасты басты темір жолдың ұзындығы 3645 км. Компанияда 54,7 мың адам еңбек етеді. Жылдық жүк айналымы барлық көлік түрлері бойынша жүк тасымалының 90 пайызын құрайды.

Транзит тасымалына – тиімді тариф

Басқа да жаңалықтар

Қазақстан теміржолшысы газеті, №32-33 28 сәуір 2026 жыл