«ҚТЖ 100 жас есім» бағдарламасының екінші кезеңі басталады

«ҚТЖ» ҰК» АҚ «Көпфункционалды қызмет көрсету орталығы» филиалы «ҚТЖ 100 жас есім» бағдарламасының екінші ағыны бойынша ақпараттық сессия өткізді.  

Онлайн форматта өткен жиында бағдарламаның мақсаттары мен шарттары, іріктеу кезеңдері мен қағидаттары туралы компанияның әлеуметтік саясат департаментінің қызметкерлері түсіндірді. Бағдарламаға қатысуға үміткерлер үшін ZOOM конференциясында сөз сөйлеген «ҚТЖ» ҰК» АҚ «Көпфункционалды қызмет көрсету орталығы» филиалы директоры Мадияр Сұлтанбек жобаға компанияның 35 жасқа дейінгі жас теміржолшылары қатыса алатынын, дарынды, бастамашыл жастарды жан-жақты дамытуда бұл жобаның тиімділігі зор екенін жеткізді. «Сонымен қатар пікір мен тәжірибе алмасып, біліміңді жетілдіріп, өзіңнің жарқын идеяларыңды жүзеге асыруда да берері мол. Осы мүмкіндікті молынан пайдаланып, болашақта компанияның еңбек өнімділігін арттыруға атсалыса беріңіздер», – деді ол.  

Әлеуметтік саясат департаментінің менеджері Дархан Нұрғали онлайн форматта өзі дайындаған слайдтарды көрсетіп, «100 жас есім» жобасына қалай келгені туралы баяндады.

– Мен бұл жобаға өзімді ұсыну туралы ұзақ ойландым, оның берері не дедім. Еңбек жолымды 2018 жылы Қарағандыда локомотив пайдалану депосында машинист көмекшісі болып бастағанмын. Жобаға өтіп, Қарағандыдан елордаға алғаш рет Жастар форумына қатысуға келген кезде ой-санамды түгел өзгерттім. Мен осында қызмет еткім келеді дедім өзіме. Сол кезден бастап менің өмірімде үлкен өзгерістер орын ала бастады. 2020 жылы мен «Қазтеміртранс» компаниясына бас маман болып жұмысқа қабылдандым. 8 айдан кейін «ҚТЖ Экспресс» компаниясына ауыстым. Бір жылдан соң қазіргі қызметіме келдім, – деді ол өзін таныстырып.  

Жобаға өтінім 15 қыркүйекке дейін қабылданады, одан әрі олардың 85 пайызы іріктеліп алынып, онлайн тестілеуге қатысады. Бұл сынақта үміткерлердің құзыреттілігі бағаланып, 20 пайызы іріктеледі. Ал желтоқсанда өтетін XI жастар форумына іріктеуден өткендер шақыртылып, компания басшылығына таныстырылады.