«VIP-ВАГОН» ЖОЛСЕРІГІ

Жаңалықтар

07.03.2017, 14:05

Теміржол дегенде әдетте жұртшылық есіне пойыз, ал теміржолшы дегенде жолсерік түсетіні рас. Олай болуы заңдылық та. Өйткені, пойызбен жүрмеген, жол үстінде жолсерікпен үзеңгілес болмаған адам кемде-кем шығар. Біздің бүгінгі кейіпкеріміз осы мамандық иесі болғанда да, ҚТЖ басшылығының қызметтік вагонының жолсерігі. Мереке қарсаңында «Самұрық-Қазына» АҚ Басқарма төрағасы Өмірзақ Шөкеевтің қолынан адал еңбегі, кәсіби біліктілігі және өз ісіне берілгендігі үшін Құрмет грамотасын алған Қызылгүл Кучукова әу баста таңдаған модельер-конструктор мамандығына сай сымдай тартылған әдемі әйел екен. Мектеп бітірген соң модельші-сәнгер кәсібін меңгермек болып, технологиялық колледжді бітірдім. Бірақ тағдыр мені теміржолға тап қылды. Оған еш өкінген емеспін, салаға бауыр басып үйреніскенім сонша, бірнеше жылдан соң Тынышбаев атындағы Көлік академиясында сырттай оқып, жоғары білім алдым. Қалған өмірімді тек теміржол көлігімен байланыстырамын, – дейді Қызылгүл. Қарағанды облысына қарасты Ағадыр ауданында теміржолшы отбасында дүниеге келген Қызылгүл үйіндегі жеті баланың төртеуі теміржол саласында тер төгіп жүргенін айтады. Қызылгүл Советқызының да теміржолда жұмыс істеп жатқанына он бес жылдан асыпты.Мен «Жолаушылар тасымалы» АҚ «Солтүстік» аймақтық филиалына қарасты арнайы міндет жүктелген қызметтік вагондардың жолсерігі болып қызмет етемін. Бұл вагондармен ҚТЖ басшылығы сапарға шығады. Жолсеріктерге қойылатын талап ортақ. ПТЭ, ИСИ, ИДП нұсқамалары мен ережелерінің талаптарын жетік білуіміз керек. Арнайы вагондар жолсеріктеріне қойылатын соншалықты арнайы талап жоқ. Тек мінсіз қызмет, шапшаңдық пен жинақылық. ҚТЖ басшылығы түрлі жағдайға орай кез келген уақытта жолға шығуы мүмкін. Сондықтан кез-келген сәтте жоғары дайындықта болуың керек, – дейді VIP-вагондардың жолсерігі. Қызылгүл бос уақытында екі баласының тәрбиесімен айналысады екен. Орыс-қазақ тілін жетік меңгерген кейіпкеріміз бүгінде ағылшын тілін үйренуге ден қойыпты. Жұбайы да теміржолшы, жолаушылар тасымалында ревизор болып қызмет етеді. Жұптары жарасқан ерлі-зайыптылардың әңгімелері де жарасымды, тақырып ортақ – ол әрине, теміржол.

«VIP-ВАГОН» ЖОЛСЕРІГІ

Басқа да жаңалықтар

Қазақстан теміржолшысы газеті, №32-33 28 сәуір 2026 жыл