Лалахан

Жаңалықтар

07.03.2017, 14:20

Оқуға 2 мин

Олар мектеп қабырғасынан бірге. Екеуі бір сыныпта оқыды. Жоғары оқу орнын бітіріп, төрт жылдан соң Алматыдан ауылға келіп, жұмыста әріптес болды. Достық сезім махаббатқа ұласып, 2009 жылдың тамыз айында некелері қиылды. Ерлі-зайыпты Аманқос пен Лалаханның егіз қозыдай жұптары жазылмайтынына көпшіліктің де көзі үйренген. Жұмыс орны бір жерде болғандықтан, бірге келіп-кетеді. Таңертеңгісін үш ұлдың тұңғышы Бекарысты мектепке, Бексұлтан мен Әлиханды балабақшаға тастап, өздері Ақтау станциясының Ішкі істер желілік бөліміне жұмысқа келеді. Екеуінің де мамандығы заңгер, күйеуі аға анықтаушы болса, Лалахан штаб бөлімшесінің бастығы. Лалахан Берденова бір үйдің тұңғыш келіні. Ол келін болып түскенде ешқандай ауыртпалық көрмедім дейді. Себебі, көп балалы отбасында өсті. Үй тірлігін ұршықша үйіріп, күйеуінің, ата-енесінің көңілінен шыға білді. Ата-анасына салмақ салмау үшін мектепте үздік оқып, өз еңбегімен ақысыз білім алды және ЖОО-нын қызыл дипломға бітірді. Оның ең бірінші тергеген ісі есірткі қылмысына қатысты екен. 2009 жылы Морпортқа келген кемеден Ресей азаматы есірткімен ұсталыпты. Қылмыстық іс сотқа жолданып, әлгі кісі екі бап бойынша, яғни қызмет бабында есірткі қолданғаны және оны шекарадан алып өткені үшін 7 жылға бас бостандығынан айырылыпты. Лалаханның айтуынша, қазір бұрынғыдай көп қылмыс жоқ. Темір жолдағы қоғамдық тәртіп алдын алу іс-шараларының, оқтын-оқтын ұйымдастырылатын профилактикалық түсінік жұмыстарының нәтижесінде көп ретке келген. Әттеген-айы, жолаушылар пойыздарындағы ұялы телефонның ұрлану фактілерінің жиі тіркелуі. Бірақ, мұндай жайттар жолаушылардың өз абайсыздығы салдарынан орын алатын көрінеді. Ұялы телефондарын қуаттауға қойып, ұйықтап қалады екен. – Полиция қызметкерінің екінші мамандығы психолог, халықпен жұмыс істеген соң неше түрліні көресің, тіл табысуға тура келеді. Біздің жұмыстың шектеулі уақыты да жоқ. Мысалы, кез келген уақытта, күн мен түн, демалысқа қарамастан дабылмен жинауы мүмкін. Мереке күндері жұмысымыз екі еселеніп кетеді, – дейді Лалахан Берденова. Өзінің мұндай ерекше есімінің себебін, ата-анасының гүлге ұқсасын деп ырымдап қойғанымен түсіндірді шыныда да гүлдей жайнаған келіншек.

Лалахан

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл