Он алты қыз

Жаңалықтар

07.03.2017, 14:27

Батысқа ашылған қақпа сынды Қызылорда станциясына аялдайтын пойыздардың ішкі қатынастан бөлек, шет елдерге қатынайтыны да жетерлік. Жоғары жылдамдықтағы «Тұлпар-Тальго» жолаушылар пойызы болса Сыр елінен Елордаға қатынайды. Міне, осынау ауқымды жолаушы халық нөпіріне қызмет көрсететін Қызылорда вокзалы сапалы сервисімен ғана емес, гүлдей жайнаған қыз-келіншектерімен де танымал десек артық айтқанымыз емес. Бір тәулікте мыңнан аса жолаушыға қызмет көрсетуге негізделген Қызылорда теміржол вокзалының іші, әсіресе билет кассасының маңы, терминалдар қашан да ығы-жығы адамнан бір босаған емес. Бірі билет алса, екіншісі өткізіп, үшіншісі интернет арқылы тапсырыс берген жол жүру құжатын немесе қол жүгін рәсімдеп жатқан жолаушы халықтың келесі бір бөлігі вокзал ішіндегі түрлі сервистік қызметтерді пайдаланып, қажетін түгендеуде. Бір ауысымда 6 адамдық құраммен 21 пар жолаушы пойыздарына жол жүру құжаттарын рәсімдейтін Қызылорда билет кассасындағы қыз-келіншектерден бөлек, вокзал кезекшісі, анықтама бөлімі, күту залы, ана мен бала бөлмесі, т.т. қызмет көрсету нүктелері бар. «Жолаушылар тасымалы» АҚ батыс аймақтық учаскесі Қызылорда филиалының «Үздік маманы» Балым Ахметова басшылық жасайтын ұжымның кілең нәзік жандылардан құралуы оларға халық арасында «Он алты қыз» деген атау әпергелі қашан. Түнгі ауысым мен күндізгі ауысымда бірдей әсем формаларын киіп, жып-жинақы қызмет орындарында отыратын қыздар қашан да жайдары, жылы жүзбен қарсы алып, қызмет көрсетеді, сәт-сапар тілеп шығарып салады. Сенбесеңіз, Қызылорда вокзалына ат басын арнайы бұрыңыз. Бүгін де міне, көктемнің алғашқы күні күндегіден де құлпырып киініп, опа-далаптарын да мерекеге сай қалыңдап жағып келген қыз-келіншектер жолаушыларына жарқылдай күліп, қызмет көрсетіп жатыр екен. Кезекті инструктаждан кейін бір-бірінің құжаттарын ауысым аралық тапсырудан кейін жұмыс орындарын тапсырып болып, суретке түсуге келісті. Бұл ауысымда 3 билет кассирлері, 1 жинақтаушы, 1 аға билет кассирі және 1 меңгеруші, барлығы 6 жан екен. Олар: Гүлнар Сұлтанова, Жанна Дәненова, Сәрсенкүл Мәмбетәлиева, Жанайым Нарбаева, Ақсалы Толыбаева, Айсұлу Әбдірешова, Гауһар Демеуова, Ырысты Мешітбаева және Балым Ахметовалар.

Он алты қыз

Басқа да жаңалықтар

Қазақстан теміржолшысы газеті, №48 23 маусым 2026 жыл