Қызметтес құрбылар

Жаңалықтар

07.03.2017, 14:30

Оқуға 2 мин

Кез-келген теміржол вокзалына барсаңыз, қонақжай үй иесіндей қарсы алатын қыз-келіншектер: вокзал кезекшілері, кассирлер, анықтама бюросының қызметкерлері, хабарлаушы дикторлар, т.т. Әйел адамның ұсынықты қолының табы мұнда да сезіліп тұрады: тап-таза жинақылық, ұқыптылық, ұядай жылылық пен жайлылық. Жолаушыға не керек, жылы қабақ танытып, қолыңызға билетіңізді беріп, жолыңызға сәттілік тілесе, көңіліңіз көтеріліп, барар жеріңізге көтеріңкі көңіл-күймен аттанып кете бересіз. Кейде вокзалда қалған қаракөз арудың бейнесі жадыңнан шықпай, жол бойы ілесіп баратыны да жасырын емес... Жамбылдың теміржол вокзалына бас сұққан біз тура осы көріністі бастан кештік. Әрі мереке қарсаңында салтанатты форма киген қыз-келікшектер әлемі көктемнің хабаршысындай көрінеді екен. «Жолаушылар тасымалы» АҚ «Оңтүстік» аймақтық филиалы кассаларының меңгерушісі Бағдат Алтынбекқызы кассир қыздарының көзге көріне бермейтін, бірақ жауапты да мазасыз жұмыстары жайлы әңгімелеп берді. – Мекемеге қарайтын телімдерде алпыс шақты қыз-келіншектер еңбек етеді. Бір ғана Жамбыл вокзалында 20 кассир еңбек етеді. Жолаушыларға билет сатып қана қоймай, олардың сұранысын қанағаттандыруда қолдан келгеннің бәрін жасауға тура келеді кейде. Әрине, әр жолаушы діттеген жеріне ертерек жету үшін кассаларға келеді. Сондықтан, болмай жатса өзге учаскелермен хабарласып, мүмкіндігінше билет тауып беріп, әр жолаушыны риза қылып аттандыруға тырысамыз. Мекемеде отыз жылдан астам уақыт еңбек етіп келе жатқан Дагилова Газиза, отыз бес жыл еңбек еткен Зина Яковлева сынды мамандарымыз бар. Олар өз өнегесін кейінгі жастарға көрсетіп, бірнеше буын кассирлер тобын тәрбиелеп шығарды. Дегенмен, біреу бес жас, он жас үлкен не кіші болғанмен, жас ерекшелігі мұнда ескерілмейді, біздің қыз-келіншектер бәрі бір-біріне құрбы, – дейді салада жиырма жылдан аса уақыт еңбек етіп келе жатқан касса меңгерушісі Бағдат Алтынбекқызы.

Қызметтес құрбылар

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл