Өндіріспен пара-пар
Теміржол көлігінде санитарлық-эпидемиологиялық, емдеу-профилактика, оңалту және қызметкерлердің өмірі мен денсаулығының қауіпсіздігін қамтамасыз ету мәселесі өндіріспен пара-пар маңызды мәселенің бірі.
«Халықтың денсаулығының деңгейі сол мемлекеттің әлеуметтік-экономикалық, мәдени және индустриялдық дамуының көрсеткіші іспетті.Сондықтан әлемдегі дені сау халық қана өзгелермен бәсекелес бола алады», – деген Елбасы Нұрсұлтан Назарбаев мемлекет тұрғындарының денсаулығы мәселесінің қаншалықты маңызды екендігін ескерткен.Зиянды еңбек жағдайы – белгілі бір өндірістік факторлардың әсері қызметкердің еңбекке қабілеттілігінің төмендеуіне немесе сырқаттану жағдайларына әкеп соғатыны белгілі. Жұмысшылардың өз еңбек міндеттерін орындауы кезінде оған зиянды өндірістік факторлардың әсер етуінен туындайтын созылмалы немесе қатты ауруларды болдырмау, олардың алдын алу мақсатында кезеңдік және ауысым алды дәрігерлік тексерулер жүргізу – теміржол саласында дәстүрге айналған шара. Осы салада жұмыс істейтіндер жылына бір рет міндетті кезеңдік дәрігерлік тексеруден өтсе, ауысыммен жұмыс істейтіндер үшін күнделікті жұмысқа түсер алдында дәрігерлік куәландыру жүргізіледі. Ол жөнінде жұмысшылардың өздерімен бірге алып жүретін қойын кітапшаларына арнайы белгі басылып, кезекші мейірбикенің қолы қойылады. Семей вагон пайдалану депосында жұмысшылардың ауысымалды дәрігерлік тексеруден өтулеріне барлық қолайлы жағдай жасалған. Ол үшін депоның әкімшілік ғимаратынан арнайы жабдықталған бөлме қарастырылған. Жұмысшылар күніне екі уақыт: бірінші ауысымға түсетіндер таңғы сағат жетіден тоғызға дейін, екінші кезектегілер кешкі сағат жетіден тоғызға дейінгі аралықта дәрігерлік байқаудан өтеді. Жұмысшылардың қан қысымы өлшеніп, көңіл күйіне, жалпы жағдайына, ішімдік ішкен-ішпегені, есірткі заттарды қолданған-қолданбағаны тексеріледі. Мейірімді мейірбикенің қырағы көзінен таңертеңгі уақытта 24, кешке 21 адам өтіп, жұмысқа рұқсат алады.
–Денсаулығында қандай да бір ауытқушылықтары барлар анықталса, олар жұмысқа жіберілмейді. Тіке теміржол емханасына барып қаралуға жолдама беріледі. Дәрігерлік тексеру қорытындысы бойынша, жұмыс орынының басшыларына есеп беріп отырамыз, – дейді мейірбике Алемгүл Савытжанова.
Ерлан ҒАЗЕЗ, Семей