"Тұлпар-тальго" халықаралық қатынаста

Жаңалықтар

28.03.2017, 14:36

Бұдан былай өзбек-қазақ достығы теміржол бойындағы ынтымақтастық арқылы нығая түспек. Ендігі жерде бауырлас қос елдің бас қаласы бір-бірімен бір жарым тәулік ішінде жалғасып, аулы аралас, қойы қоралас жатқан қос мемлекеттің халқы бір-бірімен емін-еркін араласып, алыс-берістерін нығайта түсуге мүмкіндік туып отыр. Күллі түркі-мұсылман елдеріне ортақ Наурыз мерекесі қарсаңында қазақ-өзбек халқы мерекені бірге тойлады. Өйткені, Ұлыстың ұлы күні құрметіне көптен күткен жағымды жаңалық жүзеге асып, «Алматы – Ташкент» бағытында №1/2 жаңа халықаралық жүрдек жолаушылар пойызының тұсауы кесілді. Алматы-2 вокзалында 21 наурыз күні жаңа бағдардағы пойызды салтанатты шығарып салу рәсіміне Алматы қаласының әкімдігі және өзбек этно мәдени орталығы өкілдері мен жергілікті тұрғындар, теміржолшылар мен сала ардагерлері, қала халқы көп жиналып, ұлттық компанияның вице-президенті Эрик Имашев бұл оқиғаның екі елдің достық қарым-қатынасы мен ынтымақтастығын нығайтудағы, сол арқылы көршілес жатқан бауырлас қос ел халқының тек ағайындық қарым-қатынасын ғана емес, әлеуметтік ахуалын жақсартудағы маңызы зор екеніне тоқталды. Жаңа пойыз отандық өнім - кең шанақты «Тұлпар-Тальго» вагондарынан жасақталған. «Жолаушылар тасымалы» АҚ президенті Нұрдәулет Қилыбай пойыздың алғашқы сапарына орай дәстүрлі қоңырау соғу рәсімін жасап, су жаңа көк күймелерден құралған пойызға сәт сапар тіледі. 29 вагоннан тұратын пойыз аптасына екі рет қатынайды. Алматыдан дүйсенбі, сенбі күндері, ал Ташкенттен сейсенбі, жексенбі күндері жүреді. Аталған бағдар бойынша пойыз Отар, Шу, Тараз, Түлкібас, Манкент, Шымкент, Арыс, Сарыағаш, Келес және Ташкент станцияларына тоқтайды. Бұдан былай Алматыдан Ташкентке дейінгі жол ұзақтығы 16 сағатты құрайды. Пойыз жолаушылары үшін ең басты артықшылық – шекарадағы бақылау кезінде жолаушылар купелерін шықпай-ақ барлық тексеру рәсімдерінен өте алады. Сарыағаш станциясында қазақстандық шекарашылар, ал Келес станциясында өзбекстандық шекарашылар бір жарым сағат ішінде құжаттық рәсімдерді атқарып шықпақ. Жүрдек пойыз 400 орыннан тұрады. Ол Алматы мен Ташкент сияқты туристтік орталықтарды байланыстырмақ.

"Тұлпар-тальго" халықаралық қатынаста

Басқа да жаңалықтар