Академияның профессорлық-оқутышылар құрамы ҚТЖ-да біліктілікті арттырудан өтеді
«Қазақстан теміржолшысы» газетінің тілшісі
Логистика және көлік академиясының оқытушы-профессорлар құрамы «ҚТЖ» ҰК» АҚ-да тағлымдамадан өтіп, біліктілігін арттырады.
Осы мақсатта арнайы өткен кездесуге аталған оқу орны ұжымы мен компания басшылары және тиісті департамент өкілдері қатысты. Ұлттық компанияның аппарат басшысы Серік Кеулімжаев ҚТЖ түрлі оқу орындарымен ынтымақтастықты дамыту арқылы теміржол саласына кадрлар дайындау процесін жетілдіру мәселесінің шешімін тауып отырғанын жеткізді.
– Қазақстан темір жолы ірі жұмыс беруші бола отырып, негізгі капиталы – адами ресурсқа ерекше мән береді. Кадр саясаты әлеуметтік жауапкершілік, қауіпсіздік мәдениетін қалыптастыру, көшбасшылық, қолжетімділік және айқындылық қағидаттарына негізделе отырып жүзеге асырылады. Логистика және көлік академиясы – біздің альма-матеріміз. Сіздердің біздің компанияда тәжірибеден өтуіңіз оқу процесіне және өзара тиімді ынтымақтастықты нығайтуға оң ықпал етеді деген сенімдеміз, – деді С.Кеулімжаев.
Оқу орнының оқытушылары компанияның электрлендіру және энергетика департаментінде, техникалық саясат және өндірістік қауіпсіздік департаментінде тағылымдамадан өтпек.