Жаңа станция – жастар мекені

Жаңалықтар

07.04.2017, 11:42

Оқуға 2 мин

Салтанат Тағыбергенова Шалқар – Тассай жаңа теміржол тармағында еңбек етеді. Жиырмадан енді асқан жас қыз енді құрылып-қалыптасып жатқан Тассай станциясының кезекшісі жанындағы оператор болып қызмет атқарады. Бүгінде бірнеше әріптесімен бірге қызметтік баспанада тұратын Салтанатпен оның жұмыс орнында таныстық. Еліктің лағындай сүйкімді қыздың қимылы жылдам, тірлігі тиянақты, ысылып қалғаны көрініп тұр. –Еңбек тәжірибем үлкен емес. Дегенмен, жаңадан іске қосылған жолдың бойында жауапты жұмысты атқару мен үшін үлкен мәртебе. Маған артылған осы сенім мен үмітті ақтауға тырысамын. Алғаш еңбек жолым басталған жаңа станциямен бірге менің де тәжірибем шыңдалып келеді, – дейді ол. Салтанат Шалқар ауданы Кеңдала ауылында дүниеге келген. Отбасы, ата-анасы Шалқарда тұрады. Үйдегі төрт баланың тұңғышы болғандықтан өзінен кейінгі бауырларына үлгі болуым керек деп ойлайды. Жас теміржолшы станцияға іссапармен қатынап жұмыс істеудің бастапқыда ауырға соққанын жасырмайды. Рас, Шалқар мен Тассай арасы алыс емес қой. Дегенмен, жалпы теміржол, оның үстіне әлі түгел қалыптасып үлгермеген жол бойындағы жұпыны станцияға қатынап жұмыс істеу қиын болып көрінсе де, онда өзіңдей жастармен бірге жатақханада тұрғандай бір үйде тұратындары алғашқыда романтика секілді көрініп қызықтырғаны да жасырын емес. –Жұмысқа араласқан күннен бастап романтика жайына қалды. «Білмеген жердің ой-шұқыры көп» демекші бәріне үйреніп, бейімделу қажет болды, талай рет қиналып көз жасымды жанымдағы жігіттерге көрсетпей, жылап алғанымды да жасырмаймын. Бірақ, уақыт өте үйренісе келе, бәрі жеңіл көрінетін болды. Жаңа да жас станцияның алғашқы тарихын жасап жатырмыз деген мақтаныш сезімі бізді шаршатпайды, – деп сыр бөлісті Салтанат.

Жаңа станция – жастар мекені

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл