Білімге құштар бойжеткен

Жаңалықтар

11.04.2017, 16:42

Оқуға 2 мин

Шымкент жол дистанциясының инженері Ақтолқын Асырауқызы – жолшы аталарының ізін жалғап келе жатқан әулеттегі бірінші қыз бала. Арыста өскен бойжеткеннің айтуынша, Жолановтар әулетінің теміржолдағы еңбек өтіліне биыл 117 жыл толады. Түрксіб теміржолының құрылысына тартылғандардың ішінде Ақтолқынның арғы атасы Жолан да болған. Оның ұлы Ізбан қария он бес жылын шойын жолға арнаған. Ал Ізбанның ұлы Полат 44 жыл Арыстағы жол дистанциясында жол бригадирі болды. Жарты ғасырға жуық жазық даланың ыстығында күнге қақталып, суығына тоңып, Қазақ теміржолының бүгінгі дамуына сүбелі үлесін қосқан жанды арыстықтар жақсы біледі. Оның ұлы Асырау – Ақтолқынның әкесі. – Әкем Асырау 40 жылдан бері Ірілендірілген Арыс жол дистанциясында жол шебері. Алматыдағы М.Тынышбаев атындағы ҚазККА-ның «Жол және жол шаруашылығы» мамандығын бітірдім. Біз оқуға түсерде еңбек өтілі 15 жылдан аса теміржолшылардың ұл-қыздарына аталған академияда тегін оқуға жолдама берді. Солай, әкемнің арқасында менде қатарластарымнан қалмай үлкен қала көріп, білім алдым. Мамандығым өзіме ұнайды. Ауылға барғанда әкемнен білмегенімді сұрап келемін, – дейді еңбек өтілі жетінші жылға айналған жас Ақтолқын. Жас маман жолдамамен алғаш еңбек жолын Көкшетау жол дистанциясында бастап, дистпетчер болып үш жыл еңбек еткен. Одан Астана жол дистанциясында екі жыл біліктілігін арттырыпты. Соңғы екі жылдан бері Шымкент жол дистанциясында тәжірибесін шыңдап келеді. – Міндетім – пойыздардың кідіруі мен жедел тежегіш басу оқиғасы орын алса, жағдайды анықтап, лезде құжаттарын дайындау. Өтпелердегі жол көлік оқиғалары бола қалса, оның себебі мен салдарын біліп, құжат толтыру. Мәселенің тез шешілуі үшін, әкімшіліктегі және МАИ тәртіп сақшыларымен арадағы құжаттарға жауапты болу, – деген жас маман бұдан да өзге жұмысын тізбелеп берді. Негізінен техникалық құжаттармен айналысатын өндірістік-техникалық бөлім инженерінің ұсынысы да бар. Осы сала мамандарын жылына бір рет Астанаға тәжірибе алмасуға және біліктілікті арттыруға шақырып тұрса дейді. Әрине, жанындағы ұстаз тұтқан әріптестері білмегенін үйретудан бас тартқан емес. Дегенмен, техникалық құжаттар жиі өзгеретіндіктен, соның «тілін» тез меңгеру кейде қолды ұстайды екен. Бас қаладағы мамандар жол көрсетіп, жөнге салып тұрса аймақтағылар да уақытын үнемдеп, жұмысын жеңілдетер еді деген пікір айтады білімге құштар бойжеткен.

Білімге құштар бойжеткен

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл