Қазақстан - Қытай: транзитті өсіруге мүдделі

Жаңалықтар

14.04.2017, 10:44

Қазақстанның аспан асты елімен көлік саласындағы байланысы жылдан-жылға артып келеді. Кеше қытайдың астанасы Пекинде ҚР мен ҚХР теміржол әкімшіліктері Қазақстан аумағымен Қытай-Еуропа транзиттік жүк ағынын өсіруге уағдаласты. «Қазақстан темір жолы» ҰК» АҚ президенті Қанат Алпысбаев пен Қытай темір жолдарының бас директоры Лу Дунфудің кездесіп, келіссөз жүргізуі нәтижесінде қос тарап Қазақстан мен Қытай теміржол әкімшіліктері арасындағы «Нұрлы жол» бағдарламасы мен «Жібек жолы экономикалық белдеуі» бастамашылығының даму болашағын талқылады. Қытайдан Еуропаға халықаралық жүк тасымалдауды дамытудың бес жылдық жоспары түзілгені белгілі. Қазақстан трансқұрлықтық транзиттік тасымалдауды дамытуға белсенді қатысушы болып табылады. 2015-2016 жылдар қорытындысы бойынша Қытайдан Еуропаға халықаралық контейнерлік тасымалдаудың бірнеше есеге артқандығын байқауға болады. Айталық, ол 2016 жылы 104,5 мың ЖФЭ жетті. Ал 2020 жылға қарай Қытай-Еуропа транзиттік контейнерлік тасымал көлемін 800 мың ЖФЭ жеткізу көзделіп отыр. Сондай-ақ, кездесу барысында Қазақстан мен Қытай арасындағы теміржол көлігін пайдаланудың өткен жылғы және биылғы жылғы бірінші тоқсанның қорытындысы қаралды. Өткен жылы ҚР мен ҚХР арасындағы жүк тасымалы 16,6 пайызға артып, алдыңғы жылмен салыстырғанда 8 миллион тоннаға артық болса, биылғы жылы бұл мөлшерді 10 миллион тоннаға жеткізу жоспарланып отыр. Қанат Алпысбаев контейнерлік жүк ағынын Алашаңқай-Достық мемлекетаралық шекаралық өткелден Қорғас-Алтынкөл арқылы «Қорғас-Шығыс қақпасы» АЭА Құрғақ портында өңдеуге бағыттау шарасы туралы мәлімдеді. Келіссөздер нәтижесінде Қытай-Еуропа бағдарында контейнерлік пойызды ұйымдастыру, сонымен қатар 2017 жылы мамырдан бастап «Астана –Алтынкөл» бағдарымен «Тұлпар- Тальго» ЖШС вагондарынан жасақталған жүрдек жолаушылар пойызын ЭКСПО-2017 халықаралық көрмесі аясында ұйымдастыру бойынша Келісімге қол қойылды.

Қазақстан - Қытай: транзитті өсіруге мүдделі

Басқа да жаңалықтар

Қазақстан теміржолшысы газеті, №32-33 28 сәуір 2026 жыл