Ұжым өз таңдауын жасады

Жаңалықтар

03.05.2017, 14:56

Оқуға 2 мин

Өткен аптада «Семей ЖТ бөлімшесі» кәсіподағы ұйымының филиалы Семей локомотив депосындағы кезектен тыс конференцияда жаңа төраға сайланды. Мандат комиссиясы есебінше, 450 мүшесі бар филиалдың бастауыш ұйымынан 85 делегат сайланған екен. Семей ЖТ бөлімшесі кәсіподағы ұйымының төрағасы Асхат Жармұхаметов жүргізген конференцияға «ҚТЖ - Жүк тасымалы» АҚ кәсіподақ ұйымының бас бухгалтері Айқын Өтегенов, салалық кәсіподақ ұйымы қоғамдық бірлестігінің Семей аймағы бойынша өкілі Алик Досанов және депо бастығы Дәулет Ыдырысов қатысты. Алғашқы болып сөз алған Айқын Серікұлы локомотив депосы бастауыш кәсіподағын 15 жыл басқарған Мұрат Исаковқа «ҚТЖ - Жүк тасымалы» АҚ кәсіподақ ұйымының төрағасы Ермек Төлегеновтың алғысын жеткізіп, иығына шапан жауып, үлкен теледидар сыйға тартты. Салалық кәсіподақ ұйымы орталық кеңес өкілі Алик Досанов локомотив депосы бастауыш кәсіподақ ұйымының өткен кезең ішінде атқарған іс-шараларына тоқталып, ұйым жұмысына оң баға берді. Ал оның төрағасы Мұрат Вахитовичті зейнетке шығуымен құттықтап, Алғыс хатпен марапаттап, ескерткіш сыйлық табыс етті. Семей локомотив депосының бастығы Дәулет Тайтөлеуұлы жұмыс беруші мен кәсіподақ ұйымының тығыз байланысы жайлы сөз қозғап, кәсіпорындағы еңбек тәртібін қатаң бақылауда ұстап, жұмыс сапасын арттыруға елеулі үлес қосқаны үшін бастауыш кәсіподақ ұйымына, оның жетекшісі Мұрат Исаковтың атына ризашылығын білдіріп, бүгінгі күнге дейін еткен еңбегінің жемісін көруге тілектес екендігін жеткізді. Күн тәртібінде сонымен қатар ұйымдық мәселе де қаралды. Асхат Жармұхамбетов бастауыш кәсіподақ ұйымында бұрынғыдай босатылған төраға болмайтынын, ендігі жерде цехком басқаратынын жеткізді. Яғни, өзінің негізгі лауазымдық жұмысымен қатар кәсіподақ жұмысын қоса атқаратын адам сайлау керектігін айтып, қатысушыларды ұсыныстарын білдіруге шақырды. Депоның машинисі Р.Трайспаев жаңа төрағалыққа лайық деп кәсіпорында ұзақ жылғы тәжірибесі бар, ұйымдастырушылық қабілеті жоғары Ержан Сабитовтың кандидатурасын ұсынды. Әріптестерінің ұсынысын машинистер А.В.Кремнев, Р.Х.Жакижанов, М.В.Исаковтар да қостады. Олар Ержан Сабитов 2002 жылдан бері депоның бастауыш кәсіподақ ұйымымен біте қайнаса жұмыс істеп келе жатқанына, қоғамдық жұмыстарға белсене араласып, тапсырылған жұмыстарды тиянақты атқарғанына тоқталды. Ұйым төралқасы жаңа төрағалыққа Е.Сабитовты ұсыну туралы шешім қабылдап, ашық дауысқа салғанда делегаттар Локомотив пайдалану депосының бастауыш кәсіподақ ұйымының төрағасы етіп Ержан Сабитовты бірауыздан сайлады.

Ұжым өз таңдауын жасады

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл