Қазақстан мен Өзбекстан арасындағы теміржол тасымалы 21%-ға өсті
21 қарашада Ташкент қаласында «Қазақстан темір жолы» ҰК» АҚ мен «Узбекистан темир йуллари»АҚ делегациялары арасында теміржол көлігі саласындағы ынтымақтастықты одан әрі дамыту және жүктерді тасымалдау көлемін ұлғайту мәселелері бойынша екіжақты келіссөздер болып өтті.
Қазақстан мен Өзбекстан теміржол әкімшіліктерінің тиімді жұмысының нәтижесінде тасымалдар қарқынды дамығандығы және 2023 жылдың 10 айында екі ел арасындағы тасымалдардың жалпы көлемі 21%, оның ішінде Қазақстаннан Өзбекстанға экспорт 37% өскендігі атап өтілді.
Тараптар өзара тиімді ынтымақтастықты нығайтудың және жүктерді тасымалдау үшін, оның ішінде бәсекеге қабілетті тарифтік саясат жүргізу және тасымалдау процесін цифрландыру арқылы қолайлы жағдайлар жасаудың маңыздылығын тілге тиек етті. Кездесуге қатысушылардың айтуынша, бұл тасымалдау көлемін одан әрі арттыруға септігін тигізеді.
Кездесу барысында ынтымақтастықтың жаңа бағыттары және жүктерді тасымалдауды ұйымдастыру үшін қосымша мүмкіндіктер іздеу мәселелері талқыланды.