Сексеуілдіктер жүктемесі артқан

Жаңалықтар

19.05.2017, 11:29

Қызылорда жүк тасымалы бөлімшесінің солтүстік нүктесіндегі Сексеуіл станциясының ұжымы қозғалыс қауіпсіздігінің бұзылуына жол бермей, өздерінің функционалды міндеттерін мінсіз атқарып келеді. Станцияға келген жүк вагондарын ретке келтіріп, құжаттарын рәсімдеп, жөнелтіп отыру кезінде ширақ қимыл мен жедел әрекет маңызды рөл атқаратынын ескерсек, мұнда еңбек ететіндердің басым бөлігін ондаған жыл тәжірибесі бар теміржолшылар құрайды. Сексеуілге жаңа салынған Қоскөл – Сексеуіл телімінің берілуімен станциядағы жұмыстар легі бірнеше есеге артып, станциялықтардың жүтемесі көбейе түскен. Станция бастығы Сапарғали Салмаевтың ұсынған мәліметтері бекітілген жоспар көрсеткіштерінің межеден асыра орындалғанын айғақтайды. –Сексеуіл 2 класты учаскелік станция болғанымен қазіргі таңда біздер жылжымалы құрамдарды реттеп жөнелту жұмыстарының көптігінен талдау станциясының жұмысын атқарып келеміз. Жауапкершілік артты, еңбеккерлер біріне-бірі демеу болып, өз міндеттерін бірлесіп атқаруда. Станцияға келіп-кеткен жүк вагондарының жетер нүктесіне уақтылы жөнелтілуі мен қозғалыс қауіпсіздігінің сақталуын қамтамасыз ету мақсатында жұмыла жұмыс жасаудамыз, – дейді станциясының бастығы. Жүзге жуық адам еңбек ететін станция ұжымы өздерінің функционалды міндеттерін мінсіз атқарумен қатар көктемгі комиссиялық тексеруді ұйымшылдықпен атқарып, көктем туғалы маусымдық жұмыстар, қоршаған ортаның ластанбауы мен тазалықты бір қалыпты ұстау үшін үнемі қоғамдық сенбіліктер ұйымдастырып келеді. Станция бастығы ұжымның мақтанышы деуге лайық тәжірибелі теміржолшылар қатарында станция кезекшісі Үбайділда Бәйменовті, маневр диспетчері Октябр Аманқұловты, пойыз құрастырушылар арасында Асылбек Есмамбетов пен парк кезекшісі Рысқұл Қуатовты, техкеңсе операторлары Гүлсім Жапақова мен Сәуле Жүсіпованы, жүк қабылдап-тапсырушы Сарбиназ Иманәлиева мен жүк пойызын қабылдаушы Мұрат Бәйменовтерді атап өтті.

Сексеуілдіктер жүктемесі артқан

Басқа да жаңалықтар

Қазақстан теміржолшысы газеті, №32-33 28 сәуір 2026 жыл