Алтынкөл және Достық станцияларының қызметкерлері ҚТЖ басшылығымен кездесті
Елордаға Алтынкөл және Достық шекаралық станциялар ұжымдарының өкілдері шақырылды, солардың арқасында Теміржол ынтымақтастығы ұйымының (ТЖЫҰ) кеңесінде келісілген ҚХР-ға/-дан жүктерді беру және қабылдау жөніндегі жылдық жоспар мерзімінен бұрын орындалды.
Олармен «Қазақстан темір жолы» ҰК» АҚ өндірістік процестер жөніндегі басқарушы директоры Бауыржан Орынбасаров, «ҚТЖ-Жүк тасымалы» ЖШС басшылары, «ҚТЖ-Жүк тасымалы» кәсіподақ филиалының төрағасы Ермек Төлегенов кездесті.
Кездесуге диспетчерлер, қабылдап-тапсырушылар, кассирлер, пойыз құрастырушылары және басқа да жоспардың орындалуының рекордтық көрсеткішіне мұрындық болған станцияның басқа да қызметкерлері келді.
Станция қызметкерлеріне 2023 жылғы жүк тасымалы саласындағы жұмыстың қорытындылары және мемлекетаралық түйіспе пункттерін дамыту перспективалары туралы ақпарат берілді. Қазақстан мен ҚХР теміржолшыларының үйлесімді жұмысы мен тиімді бірлескен қызметінің арқасында жылдық жоспар толық емес 11 айда орындалғаны атап өтілді. 2023 жылдың қорытындысы бойынша Қытай мен Қазақстан арасындағы теміржол көлігімен тасымалдау көлемі 28 млн тоннадан асады деп күтілуде, бұл өткен жылдың көрсеткішінен 22% жоғары.
Экспорттық және транзиттік әлеуетті арттыру үшін ҚТЖ шекара маңы станцияларын дамыту бойынша жүйелі жұмыс жүргізеді. Достық – Мойынты екінші жолдарының құрылысы шеңберінде Достық станциясын жаңғырту көзделіп отыр, бұл оның өткізу қабілетін екі есеге арттырады. Алтынкөл станциясы арқылы транзиттік дәлізді дамыту екі кезеңде жүзеге асырылатын болады. Біріншісінде – Жетіген – Қазыбек - Бек теміржол желісі (Алматы станциясын айналып өту), екіншісінде – Алтынкөл – Жетіген учаскесінің екінші жолы салынады.
Осы жылдың желтоқсан айында транзиттік декларацияларды электронды форматта автоматты түрде тіркеу және автоматты түрде шығару бойынша пилоттық жоба басталды. Жобаны ҚТЖ ҚР Қаржы министрлігінің Мемлекеттік кірістер комитетімен бірлесіп жүзеге асыруда. Жобаның бірінші кезеңі шеңберінде Алтынкөл – Сарыағаш бағыты бойынша транзитпен өтетін жүктерді электрондық декларациялау сәтті іске асырылды.
Сондай-ақ, кездесуде әлеуметтік сипаттағы мәселелер көтерілді. Іс-шара станция қызметкерлеріне ҚТЖ басшылығының Құрмет грамоталарын табыстаумен аяқталды. Шақырылғандар кездесудің тиімділігін жоғары бағалап, әңгіме жаңа өндірістік жетістіктерге қосымша қуат бергенін атап өтті.
Марапатталғандар үшін ҚТЖ өндірістік нысандары мен орталық теміржол көлігі мұражайына бару, Астананың басты көрікті жерлеріне экскурсия ұйымдастырылды.