ҚТЖ және Maqsut Narikbayev University ынтымақтастық туралы меморандумға қол қойды
"ҚТЖ" ҰК" АҚ-да компанияның кадрлық әлеуетін арттыру бойынша белсенді жұмыс жалғасуда. 2023 жылы "ҚТЖ" ҰК" АҚ-ның 2023-2024 жылдарға арналған бейінді оқу орындарымен өзара іс-қимылының жол картасы бекітілді. Еліміздің оқу орындарымен ынтымақтастық туралы 23 меморандум жасалды.
Ағымдағы жылдың 1 ақпанында "ҚТЖ" ҰК" АҚ мен Maqsut Narikbayev University арасында кадрлар даярлау және кадрларды даярлаудағы біліктілікті арттыру саласындағы ынтымақтастық туралы меморандумға қол қою рәсімі өтті. Меморандумның мақсаты - білім беру және Қазақстанның теміржол саласы үшін білікті мамандар даярлаудағы өзара қарым-қатынастарды дамыту және нығайту.
- Теміржол ел экономикасын дамытуда шешуші рөл атқарады. Оның табысты жұмыс істеуі үшін бізге заманауи технологиялар мен инфрақұрылым ғана емес, сонымен қатар жоғары кәсіби кадрлар да қажет. Дәл осы кадрлық әлеует – саланы дамытудың негізі, - деп атап өтті меморандумға қол қою рәсімі кезінде "ҚТЖ" ҰК" АҚ аппаратының басшысы Серік Кеулімжаев.
Ынтымақтастық мамандандырылған білім беру бағдарламаларын әзірлеуге және кадрларды қайта даярлауға ықпал етеді, бұл ҚТЖ қызметкерлерінің кәсіби дағдыларын нығайтады, осылайша ұсынылатын теміржол қызметтерінің сапасын арттырады.
Maqsut Narikbayev University студенттері еліміздің жетекші компанияларының бірінде тағылымдамадан өтуге, практикалық дағдылар мен білім алуға бірегей мүмкіндік алады, бұл оқуды бітіргеннен кейін олардың жұмысқа орналасуын айтарлықтай жақсартады.
Maqsut Narikbayev University провосты Сергей Пен серіктестіктің маңыздылығын атап өтті: "Бұл ынтымақтастық біздің студенттер мен оқытушылар үшін жаңа көкжиектер ашады. ҚТЖ-мен бірлесіп жұмыс істеу біздің университетке де, жалпы Қазақстанның теміржол саласына да елеулі пайда әкелетініне сенімдіміз".
