Қазақстан мен Қытай теміржолшылары 2024 жылға арналған жұмыс жоспарын талқылады
Үрімші қаласында Қазақстан мен Қытай теміржол әкімшіліктерінің жұмыс кездесуі өтті. Қазақстандық делегацияны «ҚТЖ» ҰК» АҚ өндірістік процесс жөніндегі басқарушы директоры Бауыржан Орынбасаров, Қытай тарапын – «Үрімші темір жолы» ЖШҚ басқарма төрағасы Гао Цзяньян басқарды.
Тараптар 2023 жылы шекаралық темір жолдардың жұмысын қорытындылады. Екі ел арасындағы жүктерді тасымалдау көлемі 2022 жылмен салыстырғанда 22% өсіп, рекордтық көрсеткішке – 28 млн тоннадан астамға жеткені атап өтілді. Бұл ретте Қазақстанның жүк жөнелтушілері экспортқа 12,6 млн тонна жөнелтіп, көрсеткіш 2022 жылғы деңгейге қарағанда 35% өсті. Астық жүктерінің экспорты 2 есеге, 2,2 млн тоннаға дейін, ұн мен ұнтақ өнімдері – 3 есеге, 600 мың тоннаға дейін, өсімдік майы - 56%, 180 мың тоннаға дейін, түсті металдар – 41%, 500 мың тоннаға дейін, кокс 4 есеге ұлғайды.
Кездесуде қазақстандық тарап өткен жылы атқарылған жұмыстар және 2024 жылы жоспарланған кең ауқымды жол жұмыстары, белгі беру және автоматика құралдарын жаңғырту, Мойынты – Достық учаскесінде инфрақұрылымды кеңейту туралы хабардар етті. Өз кезегінде Қытай тарапы Цзинхэ-Алашаңқай теміржол учаскесін жаңғыртуды таныстырды.
Кеңес қорытындысы бойынша тараптар Достық – Алашаңқай шекаралық өткелінде инфрақұрылымды дамыту жөніндегі жұмыстарды үндестіруге келісті. 2024 жылы инфрақұрылымды дамыту бойынша алдағы жұмыстарды ескере отырып, жүктерді тасымалдау көлемін өткен жыл деңгейінде сақтауға уағдаластыққа қол жеткізді.
Жұмыс сапары аясында қазақстандық делегация Үрімші темір жолының пойыздық диспетчерлік орталығына барды, онда жүк пойыздарын қабылдау және тапсыру, алдын ала ақпарат алмасу, оның ішінде кедендік рәсімдерді жүргізу үшін электрондық форматтағы деректер мәселелері талқыланды.
Сондай-ақ, қазақстандық делегация Алашаңқай станциясының бондтық аймағындағы дәнді дақылдар мен өсімдік майларын түсіру бойынша жаңа терминалдың жұмысымен танысты. Кездесу барысында тараптар тасымалдау технологиясы және қазақстандық агроөнімді қабылдауды ұлғайту туралы келісті.
Тэчэн қаласында ҚХР көлік министрлігінің мемлекеттік теміржол әкімшілігі мен ШҰАА Тарбағатай округі басшылығымен келіссөздер өтті. Кездесуде қазақстандық тарап Аягөз – Бақты теміржол желісін және Бақты – Тэчэн үшінші шекаралық теміржол өткелін салу бойынша жүргізіліп жатқан жұмыстар туралы хабардар етті. Қытайлық әріптестер Тэчэн - Қазақстанмен мемлекеттік шекаралық теміржол желісінің құрылысы туралы айтып берді. Тарбағатай округінің басшылығы көлік-логистикалық орталық пен қалалық өнеркәсіп аймағының құрылысы жүріп жатқан «Тэчэн округінің даму жөніндегі пилоттық аймағына» (АЭА) баруды ұйымдастырды.
Келіссөздер нәтижелері бойынша Тараптар тиісті Хаттамаға қол қойды.