Қандыағашта өткен қауіпсіздік кеңес

Жаңалықтар

13.06.2017, 13:53

Оқуға 2 мин

Ақтөбе электрмен жабдықтау дистанциясы басшылығының ұйымдастыруымен Қандыағаш қаласында «Электр қондырғыларын қауіпсіз пайдалануды ұйымдастыру» атты еңбек қауіпсіздігі және еңбекті қорғау жөніндегі тәжірибелік семинар болып өтті. Шараға Ақтөбе және Орал бөлімшесінің энергетиктері жиналды. Мекеме басшысы Сәкен Орынбаевтың айтуынша, шараның мақсаты өндірістегі жарақатты болдырмау, еңбек қауіпсіздігін жақсарту, технологиялық және еңбек тәртібін жоғарылату, жедел-техникалық құжаттама жүргізудің сапасын арттыру, электрмен жабдықтау дистанциясы бойынша электр қондырғыларының құрамы мен қызмет көрсету көрсеткіштерін жақсарту. Бүгінде Ақтөбе электрмен жабдықтау дистанциясына Орал дистанциясы да кіреді. Сондықтан бұл шараға Ақтөбе бөлімшесі бойынша Никельтау, Әйтеке би, Қандыағаш, Шұбарқұдық, т.б. тораптарындағы жауапты мамандармен қатар көрші Батыс Қазақстан облысынан да мамандар шақыртылды. Семинар аясында Ақтөбе электрмен жабдықтау дистанциясының осы жылдың 5 айы бойынша қауіпсіздік және еңбек қорғау жағдайы бойынша мекеменің бас инженері Қуаныш Әленов баяндама жасады. Оның хабарлауынша, өндірістегі ақаулардың болуына жұмыстардың дұрыс ұйымдастырылуы себеп. Жарақат алатындар электр бағандарында жұмыс істегенде қауіпсіздік ережелерін сақтай бермейді. Тексеру барысында техникалық құжаттамалардың әлсіз жүргізілетіні анықталған. Нормативтік-техникалық құжаттарды білмейтіндер де бар болып шықты. – Барлығымыз білеміз, энергетиктер жұмысы оңай емес. Электр тоғымен жұмыс істеу қауіпті. Аса сақтықты қажет етеді. Оның өмірге, денсаулыққа қауіпті екенін еш уақытта естен шығаруға болмайды. Барлығымыздың отбасыларымыз бар. Үйде күтіп отырған бала-шаға бар. Сондықтан менің осы сөздеріме ерекше мән берулеріңізді сұраймын. Біздің жұмыста қателікке жол бермеу керек, – деді бас инженер. Семинар барысында баяндамалар легінен кейін тәжірибелік бөлімі Қандыағаш станциясының дөңес паркінде жалғасты. Ондағы электр қондырғыларының жұмыс істеу барысымен білікті мамандар таныстырды. Сонымен бірге, трансформатор жұмыстары көрсетілді. Семинарға қатысушылар көкейде жүрген сауалдарын қойып, білікті кеңестер алды. Ал тәуліктің екінші жартысында барлығы өндірістік полигонға шығып, монтерлардың жұмысты қалай бастауы керектігі жөнінде дәріс алды. Дистанция кезекшілері наряд толтырудан бастап, электр қондырғыларын жөндеуге дейінгі аралықта қандай процестерге мән берілу керектігін іс жүзінде ашық аспан астында көрсетті. Қатысушылар алған білімдерін өз учаскелерінде өндірісте пайдаланатындықтарын жеткізді. Шара соңында дистанция басшысы оларға семинарға қатысқандарын растайтын сертификаттар табыстады.

Қандыағашта өткен қауіпсіздік кеңес

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл

Қазақстан теміржолшысы газеті, №79 06 қазан 2026 жыл