Бірінші орында жеке бас қауіпсіздігі

Жаңалықтар

30.06.2017, 14:02

Ел теміржолы бойынша жыл басынан бері жұмыс уақытында он жазатайым оқиға орын алып, оның төртеуі қайғылы жағдаймен аяқталған. Әрине, қайғылы жағдай көбіне жеке бас қауіпсіздігін сақтамағаннан орын алуда. Осы жайт өзгелерге сабақ болу үшін 1-10 маусым күндері Қазығұрт бекетінде «Қауіпсіз еңбек» айлығы өтті. Айлық кезінде қазығұрттықтарға алдымен өз басының, одан соң техника және еңбек қауіпсіздігін сақтай отырып жұмыс істеу керектігі тағы ескертілді. Маусымның 7 күні станция бастығы Тоқтасын Қалмырзаев айлықтың мақсатын түсіндіру үшін ұжымдық жиналыс жасаса, 12-13 күндері бәріне жоспардан тыс нұсқама мен техникалық сабақ өткізілген. Станция жолдарындағы барлық посттарға әдеттегідей аншлактар ілініп, телеграфтық нұсқамасы берілген. Мекеме басшыларымен күнтізбе жасалынып, екі рет тұтқиылдан тексеру ұйымдастырылған. Алдымен станция бастығы, екінші рет орынбасары Құнанбай Жаңабаев айлыққа қатысты ережелердің қаншалықты орындалып жатқанын анықтаған. Жұмыс орнының тазалығы, жұмысшылардың білімі мен қызметтік киім кию тәртібінің сақталуы, журнал толтыруы, құрал-саймандарын дұрыс қолдана білуін тексеру – бұлжымас қағида. Талап сондай. Бір маман селқостық танытса, екіншісі жаңадан келген болуы мүмкін. Заңдылық болып қалған еңбек және техника қауіпсіздігін сақтауға тиісті нұсқамалардың уақытылы орындалуы сөзсіз қадағаланады. Тексеру кезінде екі рет қызметтік өткелден кішігірім кемшілік табылған. Ол тез қалпына келтірілген. – Ақпан мен наурыздың арасында «Қауіпсіз еңбек және денсаулық – әр жұмысшының міндеті» атты айлық жүрді. Онда да станция басшысы мен орынбасарлары, бас инженер әрқайсысы екі реттен алты тексеру жүргізген. Нәтижесінде жеті кемшілік анықталып, берілген мерзімде түзетілді. Ақпанның алғашқы екі күнінде жұмысшылармен кезектен тыс нұсқама өткізілсе, 13-14 күндері жұмыс барысында «Еңбек және техникалық қауіпсіздік ережелерін сақтау» тақырыбында техникалық сабақ ұйымдастырылды. Жұмыс құралдарына қатысты болмаса, өрескел қателік орын алмады. Қазір қызметтік киімнен тапшылық жоқ. Башмактардың сапасы да бұрынғыдай төмен емес. Бірақ, рациялар қолданылған соң, артынша бір айдан кейін істен шығып жатыр. Сапасы нашар. Жалпы бес айда он екі рет техникалық сабақ, қауіпсіздік бойынша төрт тәжірибелік іс-шара жүрді, – дейді еңбек қорғау инженері Жұмабек Ахимов.

Бірінші орында жеке бас қауіпсіздігі

Басқа да жаңалықтар

Қазақстан теміржолшысы газеті, №32-33 28 сәуір 2026 жыл