Олжас Бектенов Құрық және Ақтау теңіз порттарының дамуымен танысты
Премьер-Министр Олжас Бектенов Маңғыстау облысына жұмыс сапары аясында өңірдің көліктік-логистикалық әлеуетімен танысып, Ақтау, Құрық теңіз порттарына барды, деп хабарлайды Rail-news.kz.
Құрық теңіз портын аралау барысында Премьер-Министрге жыл басынан бері жүктерді ауыстырып тиеу көлемі 1,5 млн тоннадан асып, жыл соңына қарай көлемі 2,2 млн тоннаға дейін жеткізілетіні баяндалды. Осы жылы порттың түбін тереңдету жұмыстарын аяқтау және астық терминалын іске қосу жоспарлануда. Логистикалық кластер құру және паром флотын жаңарту жұмыстары жүргізілуде. Жалпы перспективалық жобалық қуаттылығы жылына 6 млн тонна жүкті құрайды. Жыл бойы Құрық теңіз порты автомобиль және теміржол паромдарын қабылдай алады, ол үшін 4 арнайы айлақ бар.
Мұнда Олжас Бектеновке энергетикада, мұнай өңдеуде, химия өнеркәсібінде және т.б. пайдаланылатын "жасыл сутекті" өндіру бойынша қазақстандық-неміс инвестициялық жобасы және өзгелері де ұсынып көрсетілді. Кәсіпорынның қуаты 2 млн тоннаны құрайды. Инвестиция сомасы - 50 млрд еуродан астам. Жобаны іске асыру кезінде 40 ГВт тұщыландыру зауыты мен ЖЭК станциясын салу және пайдалану жоспарлануда. Жоба аясында 1,8 мың жұмыс орны құрылады.
Үкімет басшысы Ақтау теңіз сауда портының қуатымен танысты. Нысан Транскаспий халықаралық көлік бағдарын дамытуда шешуші рөл атқарады. Порт өзінің техникалық параметрлері мен құрылған бизнес–процестері бойынша қазіргі заманғы халықаралық стандарттарға сәйкес келеді. Техникалық жарақтандыру жүктердің кең номенклатурасын өңдеуге мүмкіндік береді. Бүгінгі таңда объектінің өткізу қабілеті 11 млн тоннадан асады. Үш мұнай құю және үш құрғақ жүк айлағы, өткізу қабілеті 800 мың астық терминалы, сондай-ақ паром кешені жұмыс істейді. Ағымдағы жылдың 8 айында порт арқылы жүктерді ауыстырып тиеу көлемі 3 млн тоннадан асты, негізгі бағыттары – Иран, Түрікменстан, Әзірбайжан, Ресей және т.б.
Мұнда Ақтау портының базасында контейнерлік хаб салу жоспарлары туралы баяндалды. Инвестор ретінде Қытайдың ең ірі порт компанияларының бірі – «Ляньюньган порты компаниялар тобы» ЖШҚ тартылды. Инвестициялық жоба тасымалдауды орта және ұзақ мерзімді жоспарлауға ықпал етеді және жүктерді жеткізу үшін қолайлы жағдайлар жасайды деп күтілуде.
Премьер-Министр халықаралық көлік дәліздерінің түйіскен жерінде орналасқан Маңғыстау облысының стратегиялық маңызын атап өтті.
"Мемлекет басшысы Үкімет алдына порттарымызды Каспий теңізінің жетекші хабтарының біріне айналдырып, трансформациялау туралы стратегиялық міндет қойды. Қазақстанның географиялық орналасуы біздің артықшылығымыз болып табылады, оны толық көлемде пайдалану қажет. Маңғыстау облысының қуатты транзиттік, логистикалық және инфрақұрылымдық-сервистік әлеуеті бар, оны дамыту қажет. Сондықтан отандық теңіз көлігі-логистикалық кластерін кеңейтуге мүмкіндік беретін жаңа жобаларды іске асыру аса маңызды", — деп атап өтті Олжас Бектенов.