Орда бұзар отызда...

Жаңалықтар

04.08.2017, 16:35

Оқуға 2 мин

Өткен жылы желтоқсанның соңында, жаңа жылға санаулы күндер қалғанда маңғыстаулық аға вагон қараушы Ерлан Ереков қауіпті ақауды анықтап, болуы мүмкін апаттың алдын алды. Қырағылығы көпке үлгі болғаны үшін теміржолшыны басшылық марапатқа ұсынды. Маңғыстау вагон пайдалану депосының техникалық қызмет көрсету бөлімінде он бес жылдан астам еңбек етіп келе жатқан аға вагон қараушы сол күні станцияға келіп аялдаған пойыздың №74875758/271 жүк вагонының бүйірлік рамасынан ұзындығы 120 миллиметрлік сынықты анықтаған. Бұл оның жұмыс тәжірибесінде анықтаған аса қауіпті ақау, бұған дейін де жеңіл желпі кемшіліктерді тауып, кейбірін жедел қалпына келтіруге атсалысқан. Кейіпкеріміздің осындай жауапты мамандықтан нәпақа тауып, өмірін темір жолмен байланыстырғанына 16 жылға жуықтапты. Осы уақыт ішінде міндетіне адал, кәсіби борышына берік вагон қараушы болып танылған. Өзі Оңтүстіктегі Жетісайдың тумасы. 1996 жылы мектеп бітірген соң батысқа қоныс аударған жас жігіт Маңғыстаудағы политехникалық колледжін бітіріп жергілікті депоға слесарь болып орналасып, еңбек жолын бастайды. Арасында әскерге барып келеді. 2006 жылы, компрессор ашылған тұста сығымдағыш қондырғысының машинисі болады. Соңғы 5-6 жылдан бері VII разрядты аға вагон қараушы. Өмірлік серігі Бағдагүл де теміржолшы. Станцияда жүк қабылдап-жөнелтуші. Шаңырақ көтергендерне 11 жыл. Бүгінде ұл-қыз өсіріп отырған бақытты жанұя. –Темір жолдан алыс ауылда өскендіктен сала жұмысынан бейхабар болдым. «Ұстазы мықтының –ұстанымы мықты», демекші, жұмысқа келген соң Жәнібек Мұқашев, Берік Имашев, Қайрат Асанов деген вагон қараушылардың қасында жүріп тәжірибе жинадым. Менің бағым да осы, ұстаздарым деп білемін,- деп ағынан жарылды Ерлан Ереков. Айтуынша, «көре, көре көсем боласың» демекші, кейде интуиция деген кез-келген құралдан артық болады екен. Айсыз түнде қолшамның жарығына сүйеніп келе жатқанда доңғалақтардан шыққан дыбыстан-ақ ақауды анықтайтын сезім интуиция емей не? Яғни балғамен ұрғанда қай ақаудың қандай дыбыс беретінін санаға сіңірудің өзі тек вагоншыға тән қасиет болса керек, деп санайды еңбегі жанған Ерлан.

Орда бұзар отызда...

Басқа да жаңалықтар

Қазір оқылуда

Қазақстан теміржолшысы газеті, №80 09 қазан 2026 жыл